UNFC hkrum ra zuphpawng galaw hpang

Mungdaw snr ginra lu ai amyusha laknak hpai hpung 12 hte hpaw shabawn tawn ai, hpyen masa mungmasa daphpawm UNFC.

Myen mung rudi amyusha rawt malan hpung ni a hpyen masa mung masa daphpawm UNFC a hkrum ra zuphpawng hpe Myen-Htai ga jarit shara mi hta August 25 ya daini kawn galaw hpang nga sai lam chye lu ai.

Dai hkrum ra hpawng hpe August 30 bat Kru Ya shani du hkra galaw sa wa na hta “UNFC a mung masa polisi hte seng nna alak mi bawngban na lam n nga tim woi awn ai ningbaw ni galai gachyai lam galaw na masa nga ai” hpe UNFC salang ni hku nna chye lu ai.

UNFC a asak 3 ning du sai majaw woi awn ai ningbaw ningla galai gachyai lam galaw ai masa mung re lam chye lu ai.

Masum ning laman daphpawm gaw amyusha rawt malan hpung ni hpe mungmasa woi awn ai lam jaw ya lu sai zawn, matut nna mung woi awn mat na re lam, UNFC a maigan kyit hkai lithkam Duwa Bawmwang Laraw zuphpawng n du shi yang tsun wa ai.

Ndai hkrum ra hpawng e UNFC kaw shanglawm ai rudi amyusha laknak hpai hpung 12 na ningbaw ningla dat kasa ni shanglawm na lam chye lu ai.

UNFC a hpaw shabawn hkrang hta mungdaw snr ginra lu ai rawt malan hpung hpe hkap la ai re.  Raitim Du kaba Yawt Sat woi awn ai Sam mung dingda RCSS/SSA hte Wa Mung Hpyendap UWSA uhpung yan gaw UNFC kaw n shanglawm ai lam chye lu ai.

Ya ten UNFC malawm 12 hte kaga laknak hpai hpung 6, yawng 18 shanglawm ai mungdang ting madang gap jahkring bawngban hpung NCCT hte asuya munghpawm simsa lam hkrang shapraw komiti UPWC lapran gap hkat jahkring ga shaka nhprang ginchyum dat na bawngban nga ten, ndai UNFC hkrum ra hpawng galaw wa ai lam mung rai nga malu ai.

Posted in: SHIGA