Kum Tsai Zup mare salang Galau Yaw Ying hpe Myen Dapnu 66 ni zingri

Hpakan kaw mu lu ai Myen Dapnu Masat 66 hpyenla ni

Hpakan lam Sabaw Maw kaw KIA Dap 6 hte lahkawng lang gap hkat wa sai hpang, manghkang byin shara hte ni ai Kum Tsai Zup mare, mare salang Galau Yaw Ying hpe Myen asuya Dapnu Masat 66 hpyenla ni rim zingri wa sai lam chye lu ai.

Ginra buga masha ni tsun ai hta, asak 60 ning jan Mare Uphkang Salang Galau Yaw Ying hpe August 12 bat Lahkawng Ya jahpawt daw rim la nna san jep ai lam galaw ai hta, adup zingri let nhkyi hte mung du hkan achyaw ya ai lam, KNG Jinghpaw Shiga Dap de tsun ai.

Myen hpyenla ni hpa baw mara shagun nna mare salang wa hpe zingri ai lam hkrak n chye lu tim, Sabaw Maw majan hte seng na re lam, ginra buga masha ni tsun nga ai re.

Adup zingri jep san ngut nna dat dat ai Slg. Yaw Ying gaw du ningma sai htaw law ai majaw ni nawn ai Nam Ya tsirung kaw tsi tsi hkam la nga ai kawn Myitkyina tsirung de htawt sai lam, matut chye lu ai.

Dapnu (tat-ma) Masat 66 na Du Awng Nai Htun ngu ai wa woi awn nna Slg. Yaw Ying hpe zingri ai re lam, ginra buga masha ni tsun nga ai re. Shi gara dap na re lam n chye lu tim ya ten Sabaw Maw hta n-gun jat tawn ai dap ni hta--- Dapnu Masat 66 npu Hk.M.Y Masat 5, 10 hte 108 ni lawm ai lam, KIA Dap 6 hpyendu langai tsun ai.

Slg. Yaw Ying hpe rim jep zingri ai lam n galaw shi yang, KIA Masat 6 Dapdung gaw tinang uphkang ginra lunghkyeng (Badi) pru ai Sabaw Maw de hpyen masa shamu shamawt wa ai Myen asuya dap hte August 8 hte 10 ya shani ni hta gasat poi byin sai re.  Ndai mabyin lahkawng hta asuya dap maga si hkala hte machyi hkrum wa sai hpe chye lu ai.

Ndai majan a majaw Sabaw Maw na Badi htu ai mung masha ni gaw ni nawn ai Nam Ya, Kap Maw Zup hte Seng Hpra mare ni de hprawng shingbyi nga ai lam chye lu ai.

Myen asuya dap gaw, Jinghpaw mungdaw sha n ga kaga majan byin nga ai amyusha rawt malan hpung ni a ginra ni hta mung, mare kahtawng wan nat jahten ai lam ni, amyu shayi ni hpe roi rip nna mara kata mare masha ni hpe rim jep sat nat zingri ai lam ni, dingyang tawt lai galaw nga ai majaw mungdan gadaga a dinglun ai lam hkrum nga ai re.

Naypyidaw asuya a matsun hte maren Sept. praw 1 ya Hpakan lungseng maw bai hpaw na nhtoi ni wa ten, ndai zawn KIA Dap 6 ginra kata asuya dap hte gap hkat lam ni byin wa nna Salang Galau Yaw Ying zingri zingrat hkrum wa ai rai nga ai.

Posted in: SHIGA