Wednesday, February 27, 2013

Lahta Sam mung Yi Hku mare hta KIA hte Myen asuya dap majan byin


MHH Kung-5 hte shanhte zing la lu ai Myen asuya dap na laknak hte kaga rai ni.
Myen asuya hte Wunpawng Mungdan Shanglawt Hpung (KIO) lapran hpyen gasat gala shayawm na galaw nga ten, Lahta Sam mung Pangsai ninghtawn Yi Hku mare makau kaw dai hpawt daw aten kadun gasat poi byin sai re.

Jahpawt hkying 10:00 ten daram hta hpyenla n-gun yawng 200 daram nga ai asuya dap ni gaw KIO npu Mungshawa Hpyen Hpung (MHH), kung-5 dap nga ai shara de akajawng sha shang wa nna laknak kaba ni hte gap bun wa ai majaw, lahkawng maga kawn gap gasat wa ai re nga kung-5 hpyendu langai KNG Jinghpaw Shiga Dap de tsun wa ai.

Dai asuya dap ni gaw Hk.L.Y masat 69, Hk.L.Y masat 242 ni rai nna MHH Kung-5 hte jahpawt daw hkying hkum chyen mi na hkra man ap gasat kapaw hkat ai majan hta, asuya maga na marai 2 sawng dik ai hku hkala hkrum nna kalang ta tsirung de htaw mat ai lam MHH hpyendu wa tsun ai.

Asuya dap ni hkrat sum hkala ai lam nga ai hte MHH maga hkrat sum hkala ai lam n nga ai nga tsun ai raitim alak mi shagrin lu ai lam gaw n nga ai.

Ya ten asuya dap ni gaw MHH dap ni nga ai shara Pangsai mare makau hta hpyen n-gun yawng 300 daram jat bang jahkrat da ai lam a marang matut nna majan mai byin wa ai lam lahta na MHH hpyendu wa tsun ai.

Mani bat Langai Ya jahpawt hkying 8:30 ten hta mung Hka Len mare dingsa makau hta uhpung lahkawng dap lapran aten kadun gasat gala byin sai re.

Sam mung sinpraw-dingdung KIA Dapba (4) ginra hta asuya dap ni February 19 ya kawn hpang nna hpyen n-gun jat bang wa ai lam ginra buga mare masha ni tsun ai.

Ya ten Myen asuya hte KIO lapran mungmasa bawngban madang du hkra jahkrup jahkrum nga ten, maga mi de majan shayawm na myit hkrum ai lam galaw da ai ten, ndai zawn majan ni matut byin nga ai lam re.

Dai hte maren Dapba (5) KIA ginjaw ginra de asuya dap kawn hpyen n-gun htaw ai mawdaw yawng 30 gaw, Laban jahpawt hkying 9:00 ten hta Lajayang makau Mansai mare hta matut jat bang wa ai lam shawnglam na KIA shiga lawk tsun ai.

Dai asuya dap ni gaw dap nu (77) Manmaw maga kawn rai nna malu masha ni hte hpyen n-gun 400 jan shamu shamawt lung wa ai lam KIA kawn maram tsun ai.

KIO/KIA ginjaw ginra Lajayang shara makau htim gasat nga ai masing jahkring sai lam January 19 ya shani Mungdan Gumsan Magam U Ting Tsing kawn matsun jahkrat da ai raitim, matut shuk hkrat nga ai shara rai nga ai.

www.kachinnews.com
www.burmese.kachinnews.com
www.kahcin.kachinnews.com
www.kachin-news.blogspot.com
http://www.facebook.com/Kachin-News-Group

0 comments:

Post a Comment