Shiga ICRC hpung Laiza Muklum Tsin-yam dabang de du shang nna tsi mawan garum

Myen asuya pat hkum da ai lapran Laiza de du shang wa ai ICRC mawdaw ni.

Miwa-Myen ga jarit Wunpawng Mungdan Shanglawt Hpung (KIO) uphkang gaiwang Laiza Muklum de ICRC mungdan gadaga hkamja dap kawn February 26 ya hta tsi mawan ni sa garum jaw ai lam chye lu ai.


ICRC-Yangon kawn Laiza Muklum makau grupyin na hpyen yen tsin-yam dabang a matu tsi mawan hte kaga tsi hte seng ai arung arai ni hpe ICRC mawdaw 3 hte htaw sa nna garum shingtau sa wa ai re nga KIO Hpyen Yen Lakawn Lanawn Komiti a lithkam Salang Kaba Labang Doi Pyi Sa tsun ai.

“Mani du ai. Dai hpawt gaw Laiza mungshawa tsirung hte hpyen tsirung ni kaw sa yu ai. Daini gaw tsin-yam dabang ni hkan sa ai. Shanhte madung gaw majan kaw hkala hkrum ai masha ni, majan a majaw jamjau hkrum nga ai tsin-yam masha ni gara hku nga nga ai ngu ai hpe sa gawan yu ai re. Matut nna hpa naw ra ai..hpa baw ni naw garum ya ra na ngu ai hpe sa yu ai nga tsun ai.”

Laiza mungshawa tsirung kaba hta tsi hte seng nna sung lang ra ai arung arai ni sa du garum jaw ai re lam, Laiza mungshawa tsirung up Salang Tu Awng mung KNG Jinghpaw Shiga Dap de tsun ai.

“Zendau zawn re ai ni..law malawng gaw tsi hte seng ai kaw sung lang ai baw arung arai ni re. Sum-doi ni lawm ai. Machyi masha dung na kanawng ai baw lahkum ni lawm ai. Anhte (KIO) a matu tsi gaw n lawm ai. Shanhte byin mai ai daram sa garum da ai re” nga shi matut tsun ai.

Mungdan gadaga wuhpung uphpawng kawn, ya yang na mayak mahkak hkrum nga ai ladaw hta sa du gawan katsan garum gahtau la ai a marang htawm e garum ningtum ahkaw ahkang mahkrun grau nna masan sa wa mai ai nga Salang Kaba Labang Doi Pyi Sa maram tsun ai.

“Shanhte ya na zawn re masing hte sa du ai hkrak ai. Shanhte Yangon e mungkan shiga sha madat hkaja nga yang KIO sha ra rawng nna asuya gaw kaja ai zawn, dai zawn re ni shanhte chye na hkawn hkrang na yak ai. Ndai kaw du nna anhte hte hkrum shaga ai lam galaw ai. Tsin-yam ni a mabyin masa tsun jahta ai. Shara ni hkan madun ai. Ya yang na mungmasa lamyan hpe mung seng ang ai Salang ni kaw na chye ging chye mai ai daram tsun dan ai. Shanhte ndai kaw sa du hkrum shaga ai majaw ndai kaw na lam hpe grau chye na hkrawn hkrang mat wa ai. Shanhte nan mung maigan e kaja nan jaw ang ai masa lamyan hpe sakse hku tsun lu ai masha ni re. Dai gaw htawm a matu kaja ai mahtai pru wa mai ai hpe mu mada ai.”

Dai hpung hpe maigan masha Dominik Urban woi awn nhtawm maigan masha marai 4 lawm ai hte wuhpung masha marai 9 rai nna February 24 ya shani kaw na Ginjaw Laiza Muklum de pru sa wa ai raitim, Lajayang garai n du yang na mahkrai hta Lajayang asuya dap ni kawn shimlam lit n lu la ya ai nga tsun wa ai majaw, shanhte gaw Manmaw de bai nhtang wa nna Loije-Mai Ja Yang maga hku KIO Ginjaw de bai shang wa ai lam chye lu ai.

“Shanhte Manmaw-Dawhpumyang lam hku sa wa ai. Munglai Hka rap yang she Laiza makau na Laja Yang du ai. Dai kaw rap ra ai mahkrai kaw mawdaw n mai lai ai. KIA ni bawm hkam da ai. Shim lam n nga ai nga bai nhtang kau shangun ai da. Dai kaw na shanhte Manmaw du hkra bai nhtang mat ai. Manmaw kaw na Loije bai nna KIO ginra Mai Ja Yang du yang anhte bai sa tau la ai” nga Salang Kaba Labang Doi Pyi Sa tsun ai.

Asuya Yangon daju mungkan gadaga hkamja dap ICRC hpung ni gaw February 28 ya hta Laiza ginjaw kawn bai nhtang wa mat na re lam chye lu ai.

Mungdan gumsan magam U Ting Tsing wa mung ndai shata praw kaw na Jinghpaw mungdaw hpe mungdan gadaga UN garum ningtum ahkang jaw sai lam tsun ai hpang Jinghpaw mungdaw de tsin-yam masha garum ningtum ni matut manoi sa du ai raitim, gumsan magam a matsun ga tatut hta kang n kang masa maram nga ai ten mung re lam chye lu ai.

www.kachinnews.com
www.burmese.kachinnews.com
www.kahcin.kachinnews.com
www.kachin-news.blogspot.com
http://www.facebook.com/Kachin-News-Groupး

Posted in: SHIGA