Zai Awng tsin-yam dabang hta tsi mawan ra kadawn

Sadung Masat Shadaw 6 hpyen yen dabang.

Jinghpaw mungdaw Waimaw ginwang Miwa ga jarit Zai Awng snr "Za" tsin-yam dabang hta katsi lawt nna waw shang, jahkru masha law ai majaw tsi mawan ra kadawn nga ai lam chye lu ai.

Waw shang jahkru ai masha lani mi hta marai 20 daram byin nga nna kan hkyeng, kan mase ai, maru byin ai ni, sai rawt ana byin ai ni shani shagu tsi jaw gawk de du nga ai majaw tsi dingyang ra nga ai lam chye lu ai.

Dai byin ai lam gaw February shata 10 ya a hpang grau law wa ai rai nna grau nna ya ten hta ma kaji ni a matu waw tsi, kan mase kan makret tsi hte n-gun tsi ni ra nga ai lam dabang hkamja dap na Sara Yaw Htung tsun ai.

"Tsi ni n law n la rai taw ai. Hpa majaw nga yang madung gaw KBC (Jinghpaw Wunpawng Hkalup Hpung Ginjaw) kawn yu nga ai hta shanhte mung shata 4, 5 hta she kalang lu jaw ai. Tsin-yam masha ni a matu shata mi hta tsi manu hte seng nna Kyat sen 10 daram sha jaw ai majaw tsi ni n law ai le I,” nga KNG Jinghpaw Shiga Dap de tsun wa ai.

Du hkra ladaw galai shai wa ai hta tsin-yam dabang ni hkan nhpu gaw htat nga ai kaw lu hka mayak mahkak bai nga taw ai majaw re nga tsun ai.

Tsin-yam dabang tsi jaw gawk kaw shani shagu machyi masha nga ai raitim si hkrung si htan gaw n byin shi ai lam hte ya ten shingtai HIV/TB sin wawp ana byin nga ai wa chyu sha tsang ra ai madang re lam lahta na dabang tsi sara wa tsun ai.

Zai Awng (snr Mungga Zup) Tsin-yam dabang hta Uropa mungdan garum ningtum hpung 12 kawn malu masha hpe January 30 ya hpang jahtum garum jaw da nna, matut garum ningtum lu na n lu na atsawm n lu maram ai majaw grai tsang nga ai lam dai tsin-yam dabang na hpaw-mi langai tsun ai.

"Ya na ten hta malu masha hpe kadai bai lit la nna jaw sha na kun?.. gaw lusha na kun nga grai myit kaji nga ma ai. Nkau mi gaw lusha na pyi yak taw nga sai. Ya gaw kadai bai garum la na kun n chye ai..tsun mung n tsun dan ma ai."

Zai Awng (snr Mungga Zup) Tsin-yam dabang hta masha jahpan yawng 2,556 tup shanu shingbyi nga shajang nhtawm tsi mawan ra kadawn nga ai lapran machyi masha ni tsi jaw gawk de dingyang ding-gren nna matut tsi tsi hkam la shajang nga ai lam chye lu ai.

Tsi mawan ni hpe Miwa mung Yunnan mungdaw Kunming hkalup nawku hpung (Kunming Baptist Church) kawn dangdi dang dep ai daram garum nga ma ai raitim, matut nna bai ra kadawn wa ai lam re nga hkamja dap ni tsun ai.

www.kachinnews.com
www.burmese.kachinnews.com
www.kahcin.kachinnews.com
www.kachin-news.blogspot.com
http://www.facebook.com/Kachin-News-Groupး

Posted in: SHIGA