Friday, July 22, 2016

Myen hte KIA, shara lahkawng e gap hkat

Myen hte KIA, shara lahkawng e gap hkat

Wunpawng Mungdan Shanglawt Hpyendap KIA hte Myen asuya dap lapran, Jinghpaw mungdaw a sinpraw hte dingda shara lahkawng e July 21, mani gasat galat majan byin wa sai.

Myitkyina-Manmaw mawdaw lam Dabak makau, Naw Gu kahtawng shingnawm e asuya dap Hk.L.Y (51), Hk.M.Y (382) pawng hpawm hpyen hpung hte KIA Ginjaw Shimlam Dap lapran Bat Mali Ya jahpawt daw aten gadun gasat hkat wa sai re.

KIA maga bawm 7 hte lam hkap gasat ai kaw Myen hpyen marai 15 si, kaga marai 20 jan hkala hkrum ai lam, shawnglam shiga lawk ni Jinghpaw Shiga Dap KNG de tsun wa ai.

Tinang KIA ni bawm hte hkap gasat ai hta asuya dap maga si hkala law na re lam KIA Ginjaw Shimlam Hpyen Hpung, hpyendu langai matut tsun ai re. Raitim KIA maga si hkala n nga ai hpe shi tsun ai.

Ya majan byin ai shara gaw, Myitkyina-Manmaw lam a sinna hte Mali Hka nu lapran ginra hta re. Dai ginra hta, lai wa sai March shata htum, Amyusha Democracy Ginjaw Pati (NLD) asuya n’nan lung wa ai aten kaw nna dai ginra na ‘KIA dap ni mahkra ye shamyit kau na hpyen majan masing’ hpe Myen hpyendap galaw wa ai re.

Mani hpawt kaga shara, Manmaw ginwang, Manje KIA Masat (3) Dapba npu Dapdung (12) ginra Zai Bru Tsun Yang ngu ai shara hta mung asuya dap hte gasat poi byin wa sai raitim lahkawng maga si hkala lam n chye shi ai.

Myen hpyendap a July 20 Yangon shiga sanglang hpawng e Lat Du Daju Jum Mya Htun Oo hku nna, tinang tatmadaw hpyendap gaw, amyusha rawt malan hpung ni yawng shanglawm na Mai Ja Yang zuphpawng hpe ‘mai byin yang n galaw shangun mayu ai lam’ tsun shapraw dat sai re. Shing rai, hpang shani hta ndai majan byin wa ai lam re.


0 comments:

Post a Comment