Wednesday, September 21, 2016

Hpyen wa hpe ma-nga kau lu hkra kyu jawm hpyi na, KIO Ginjaw Komiti ndau


Myen asuya dap gaw Ginjaw Ginra zing na majan kaba baw hpang nga ten, kyu ja ja hpyi nga na matu, Wunpawng Mungdan Shanglawt Hpung KIO Ginjaw Komiti kaw nna September 19 nhtoi the tinang Jinghpaw mungshawa ni de ndau lajin dat sai re.

‘Myen Mung Asuya maga mungmasa bawngban chyinghka hpaw wa ai hte shingrau nhtawm, Myen Hpyen Dap gaw KIO a uphkang lam hte hpyen masa lam hta hkridun sai ru matut shara ni hpe langai hpang langai zing lu hkra n gun kaba hte gasat wa ai majaw kyu hpyi na matu’ KIO ginjaw komiti ndau ai re.

Ya ten Myen Asuya dap ni gaw KIO ginjaw ginra shimlam a matu hpyen masa hku nna ahkyak ai Sama Ginwang, Myitkyina-Manmaw lam sinpraw hkran KIA Dap Nawng Dapdung 252 shara Nhkram Bum hte KIA Dung 3 Lai Hpawng Bum ni hpe n lu n mai htu gasat nga ai gaw bat lahkawng jan sai re.

“Ginjaw ginra ni, jarit mayan ni hta Myen ni laja lana rai majan kaba gasat wa na masa nga ai majaw, anhte a rawt malan hkrun lam gaw Karai Kasang hte rau hkawm sa wa lu na matu Mungshawa Dap shawa hpe kyu hpyi na lam shajin ai” re nga KIO Shiga Dap lit nga Du kaba Nhpang Naw Bu tsun ai re.

Kyu hpyi na lam hta ya ten laja lana gasat hkrum nga ai KIO ginjaw ginra Nhkram Bum hte Dung 3 Lai Hpawng ginra, Jinghpaw mungdaw hte lahta Sam mung KIA Dap Ba shagu ni hta htim gasat hkrum nga ai majan ni hpe gasat ma-nga kau lu na matu ni rai nga ai.

Jinghpaw Nawku hpung ni hku nna gaw KIO shana tim, n shana tim rawt malan hkrun lam a matu kyu hpyi dingyang re nga, Myitkyina na nawku hpung woi ni Jinghpaw Shiga Dap KNG de tsun ai re.


0 comments:

Post a Comment