Hpawng Seng na Myen dap ni bawm hte gasat hkrum, 1 ningma sawng

Lahta Sam mung Hpawng Seng kaw du nga ai Myen asuya dap gaw mawdaw lam shimlam la hkawm ai shaloi, daina maga hkying 4 jan ten, kadai re n chye ai hkam tawn ai bawm langai kapaw la nna marai 1 ningma sawng hkala hkrum ai lam, myi-chyaw-mu ginra buga masha ni tsun ai.

Bawm kapaw ai shara gaw Nawng Jang ngu ai Hpawng Seng mare hte sinna maga deng 2 daram gang ai re. Ndai shara gaw--- Hpawng Seng mare, Mong Ko byu-ha daju hte Miwa hkran Bangwa mare, ni de matut ai masum brum lam numshe re.

Hkum ting sai hkrai hkrai rai hkala hkrum ai ndai hpyenla wa hpe Hpawng Seng de hpai wa ai hpe mu ai lam, dai hpyenla wa gaw, ya ten Hpawng Seng ginra hta du nga ai Dapnu Masat 88 kata HK.L.Y Masat (13) na hpyenma re lam, buga masha ni Kachinnews de tsun ai.

Dai lam numshe hta sha, lai wa sai masum ya, July praw 7 shani ga-ang hpang kadai re n chye ai hkam tawn ai bawm lahkawng, aten loi gang nna langai hpang langai kapaw ai kaw ginra buga masha 2 si, 1 hkala hkrum ai lam byin sai.

Shawng na kapaw ai hta si ai wa gaw Mong Ko, Shau Shwi Chyin mare na Slg. Ai Koi, asak 34 ning rai nna hkala hkrum ai wa gaw Pang Tsi Dai mare masha Slg. Ai Lin, asak 27 ning rai nna, hpang na kapaw ai hta si ai gaw Pang Tsi Dai mare masha Slg. E Nye, asak 30 re lam, Tatmadaw hpyendap a Myawady shiga hta July praw 9 ya shani shale ai re.

Ndai mabyin hte seng nna, ya ten Hpawng Seng ginra hta daju ai Myen hpyendap Dapnu (Tatma) Masat 88 byu-ha-mu Nai Oo gaw hpawt ni Hpawng Seng mare masha ni hte hkrum na sa wa ai hta, lam shimlam sa la ya ai hpyenla ni ya na zawn bawm hte gasat hkrum ai lam re.

Kokang ginra hte Sak Hkung Hka jarit ai Hpawng Seng ginra gaw Wunpawng Mungdan Shanglawt Hpyendap (KIA), ya Dapba 6 npu Dapdung 38 ginra re.

Lai wa sai June 26 kaw nna Hpawng Seng ginra hta Myen hpyendap Dapnu (Tatma) Masat 88 hte KIA Dap dung 38 lapran hpyen masa shaja hkat wa ai majaw, June 29 kaw nna Hpawng Seng grupyin kahtawng 4 na mare masha 400 jan gaw ni nawn ai Miwa hkran, Bang Wa mare hta hprawng shingbyi nga ai re.

Ya hpang jahtum bawm kapaw ai mabyin a majaw, Tatma byu-ha-mu Nai Oo a hpawt ni Hpawng Seng mare masha ni hte hkrum na lam n teng mat ai hte, shi a hpyen hpung mung daina maga mare kaw na pru mat ai lam, sagawn chye lu ai.

Posted in: