Myen gaw KIA Mali Yang post hpe zing na n-gun gahkyin nga sai

Myen asuya hpyen dap gaw Wunpawng Mungdan Shanglawt Hpyendap (KIA) a Dapdung 7, Mali Hkrang Walawng de shang wa ai chyinghka, Mali Yang mare post hpe zing na n-gun gahkyin nga sai re.

Ya ten Sumprabum hta n-gun gahkyin du nga ai Myen dap ni gaw--- Putau daju Hk.L.Y Masat 46, 137, 138 hte Tanggu Dang (Ahdang) pyitusit hpung, Myitkyina daju Hk.L.Y Masat 29 hte 37 sha n ga Ywa Htawng (Sagai) daju Dapnu (Tat-ma) Masat 33 ni lawm ai lam, KIA shiga lawk tsun ai re.

Mali Yang gaw Sumprabum mare a sinpraw maga lamu hku deng 8 jan (lagaw lam hku deng 20 daram) tsan ai shara hta nga ai rai nna, KIA Dapba 1 npu Dapdung 7 hte hkridun ai ahkyak ai lam hta nga ai re.

Myen-KIO Ginrun Manghkang Hparan Masit Komiti malawm, KIA ginjaw Laiza na Du Kaba Naw Bu Kachinnews de tsun ai gaw, "Ya anhte Dung 7 ni de Mali Hkrang Walawng a hkawmsa hkawmwa hka lam, jak li ma hkra gaw dai hku lai ai.  Dai kaw dung jang gaw e dai jak li hkrunlam ni...Dung 7 hte Mali Hkrang Walawng na ra mara hkrunlam ni ma hkra shanhte dai kaw jum tek mayu ai majaw Mali Yang de shara bai la mayu ai rai na ma ai.”

Shawng e Mali Yang hta Myen dap ni dung yu sai raitim shanhte bai yen kau ai majaw KIA ni galai dung ai re lam, chye lu ai.

“Shaloi jang gaw dai shara la lu hkra nga jang gaw loi mi kaba ai hku sha hpyen masa kaba ai hku sha nhtang da yang gaw shanhte ma yak ai le. Dai re majaw dai hpyen n-gun gahkyin ai rai na malu ai ngu maram ya ai hku rai nga ai,” nga Du Kaba Naw Bu bai tsun ai.

Masum lang gasat poi byin

Mali Yang post hpe zing la na matu htu lung ai Myen hpyen hpung ni hte KIA dung 7 lapran (3) lang gasat poi byin sai re.

Lai wa sai masum ya, July praw 6 ya shana de hkying 4 hte 5 lapran, Sumprabum-Mali Yang lam seng ai hku nna lung wa ai Myen hpyen ni hte gasat poi kaji byin ai lam, Du Kaba Naw Bu tsun ai re.

Ndai mabyin hta uhpung lahkawng maga si hkala nga n nga n chye lu shi ai.

Bai, lai wa sai bat lahkawng jan, June 24 hte 27 hta laja lana gasat poi byin wa sai re. Dai mabyin lahkawng hta KIA maga hpa n ra tim, Myen dap maga Du Jum 1 hte gyi 1 hkrat sum nna, kaga marai 20 hkawt hkala hkrum ai lam, Dapba 1 shiga lawk tsun ai.

Mali Hka a sinna hkran Mali Yang majan byin wa ai hpang, June 29 ya kaw nna Myen hpyendap gaw Putau-Myitkyina jak li matut mahkai lam hpe pat tawn sai re.

Lai wa sai June shata kaw nna Myen hpyendap gaw KIA Dung 6 ginra Hpakan lungseng maw hte Lahta Sam mung KIA Dapdung 36, 38 Munggu ginra ni de mung hpyen n-gun wa jat ai majaw KIA hte shani shagu ngu na gasat gala lam ni byin nga ai re.

Myen mung hta dai ning October snr November hta galaw na ra lata poi a matu hkyen lajang nga ai ten, 2008 gaw da ai tara hpe gram na ja ja ninghkap tawn ai Tatmadaw hpyendap gaw, ya ten Jinghpaw sha n ga, kaga Karen, Sam, Balawng hte Kokang amyusha rawt malan hpung ni hpe mung mara tam majan baw gasat ai lam ni galaw nga ai re.

Posted in: