KIA Mali Yang post hpe yen ya tim, majan matut byin

KIA Mali Yang post hpe yen ya tim, majan matut byin

Shata mi daram Myen mung asuya dap hte laja lana majan byin nga ai shara, Mali Hka hku Wunpawng Mungdan Shanglawt Hpyendap (KIA) a Mali Yang post hpe yen ya sai raitim majan naw byin nga ai lam, KIA salang ni tsun shateng ai re.

July 15, bat Masum Ya shani hkying hkum 8 jan Myen dap hte KIA Dung 7 lapran gasat poi byin nna, shana hkying 11:30 daram hta dap yen ya ai lam, ginjaw Laiza na Myen-KIO Ginrun Manghkang Hparan Jasan Komiti malawm Du Kaba Nhpang Naw Bu Kachinnews de tsun ai.

Myen gaw Sumprabum hta n-gun 600 jan gahkyin nna Mali Yang post hpe n lu lu hkra gasat zing ai rai nna, ya ten Mali Yang e dap shangang mat na galaw nga ai hpe mu lu ai lam, Du Kaba Naw Bu tsun ai.

Raitim Mali Yang post grupyin hta mana hkying 6 jan kaw nna bai gap hkat ai, dai hpawt jau kaw nna mung bai gap hkat ai lam, majan ginra na mung shawa ni tsun ai re. 

July 11, bat Kru Ya shani Myen jet nbungli lahkawng Mali Yang post hpe 2 lang wa gap nna, Sumprabum Mada Sawn kaw nna mung laknak kaba ni gap hpang dat ai, mali ya hta KIA Dung 7 Mali Hkrang Walawng pru-shang chyinghka, jak li daru mung rai nga ai Mali Yang post hpe Myen dap ni bai zing ai lam re.

2011 ning Myen hte KIO majan byin hpang wa ten, Hka Garan Myen dap hpe KIA ni hpya kau ai hpang Mali Yang kaw dung nga ai Myen dap ni yen mat ai majaw KIA Dapba 1 npu Dung 7 ni galai dung ai lam, KIA ni tsun ai.

Myen hpyendap gaw KIA hpe Myitkyina-Putau mawdaw lam hte Mali Hka lapran, n nga shangun mayu nna gawt ai majan masing hte ya Mali Yang hta gasat nga ai re lam KIO/KIA ginjaw salang ni tsun ai re.  Dai re majaw tinang KIA maga mung mai byin ai made hkap shingla gasat mat na re lam, KIO/KIA salang ni tsun ai.

Galoi mung KIO/KIA hpe jahten sharun hpung hku masat jahpyak tsun ai, Myen mung asuya hte hpyendap ni madu ai shiga ni hta, laklak lailai ya Mali Yang e laja lana byin nga ai majan shiga, alak mi tang madun ai lam n nga shi ai re.

Hpyen hprawng masha 2,000 du

Mali Yang majan a majaw pru wa ai hpyen yen masha daini hpang jahtum chye lu ai jahpan 2,000 hkawt re lam, Jinghpaw Wunpawng Hkalup Hpung Ginjaw (KBC) a Mu Na Kyithkai Dap lit hkam Sara Lama Yaw tsun ai.

Ndai hpyen yen ni gaw shanglawt uphkang ai kahtawng maga—Mali Yang, Lawt Mai Yang, Nhtan Zup, Nlang Ga hte Ja Ra Yang mare na nna, shanhte yawng ya ten Mali Hka a sinpraw hkran KIA Dung 7 ginra shara 2 kaw hprawng yen let but jawng nga ai lam chye lu ai.

Daini Bat Kru Ya shani du hkra malu masha garum ntum ni hpyen yen ni de garai n lu shalai shi ai re.

Myitkyina KBC rung gaw Myen kyat sen 70 daram na n-gu, malu masha, sut, muga, marang palawng ni hte tsi mawan ni hpe shalai jaw na jin jin rai nga sai raitim, Myen asuya a ahkaw ahkang hpe naw la nga ai lam, Sara Lama Yaw tsun ai.

KBC a hpyen yen garum ntum sa jaw na lam hte seng nna, July 14 ya hta KBC gaw Jinghpaw Mungdaw asuya hkringmang daju Slg. Lajawn Ngan Seng de hkringdat nna laika shana ai zawn, dai laika kanan hpe Myitkyina KIO Machyoi Hpung Rapdaw Rung (TAT) hte mungkan tsinyam garum ntum hpung--- UNICEP, UNOCHA, UNHCR hte WFP ni de mung shabra dat sai re.

Raitim, Jinghpaw mungdaw asuya ahkang n jaw lu ai lam tsun wa ai majaw, Myitkyina Myen hpyendap daju M.P.Hk taimu de kahtap hpyi ai shaloi--- Myitkyina-Sumprabum mawdaw lam hku sha ahkang jaw ai lam tsun nna, Mali Hka jak li lam hku gaw shimlam lit n la ya lu ai ngu nna ahkang n jaw ai lam, Sr. Lama Ya tsun ai.

Putau-Myitkyina lapran mung masha ni madung hkawmsa hkawmwa galaw ai gaw Mali Hka jak li lam re. Ndai lam hpe June 29 kaw nna Myen hpyendap ni pat tawn ai re. Myen gaw June 24 ya shani KIA Mali Yang post hpe htu gasat hpang dat nna ndai hka lam hpe mung pat ai lam re.

Asuya ni ahkang jaw ai mawdaw lam hku gaw sa mai tim, ya ten Lanam Ta hkum puk hkum pa law nna mawdaw hkawm yak ai majaw gara hku mung hpyen yen ni de grai ra gadawn nga ai garum ntum ni hpe aten dep shadu lu na n mai byin ai lam Sr Lama Yaw tsun ai.

Hkyak hkyak ra gadawn nga ai garum ntum ni lawan shadu ya lu na matu, KBC gaw M.P.Hk kaw nna madi shadaw laika ka ya na hpyi tawn ai lam, dai laika lu ai hte garum ntum wa sa na re lam, Sr. Lama Yaw tsun ai re.

Ya ten Jinghpaw mungdaw e Lanam Ta marang matut manoi htu nga ai majaw mung hpyen yen ni hta plastic muga, marang palawng hte tsi mawang ni grai ra gadawn nga ai lam chye lu ai.

Posted in: