Hkawnglanghpu ginra hta n gu garum ntum ra nga

Hkawnglanghpu ginra hta n gu garum ntum ra nga

Jinghpaw mungdaw Putau ginwang Hkawnglanghpu ginra hta April praw kaw nna lamu marang kaba matut manoi htu nna byin pru wa ai shingra tara tsinyam a majaw buga masha ni n gu malu masha n nga garum ntum ra kadawn nga sai re.


Putau mare a sinpraw maga deng 130 jan, Hkawnglanghpu de April 10 daram kaw nna ya May htum wa du hkra marang n sim n sa htu nna hka mawru, hkyen mawru ni byin ai hte sharut gyi ai lam ni byin wa ai re.

De majaw kahtawng (16) hte nta (80) jan hten nna, Hkawnglanghpu ginra masha mun mi jan gaw n gu tam sha shara n nga yak hkak hkrum nga ai lam ginra masha ni Jinghpaw Shiga Dap KNG de tsun wa ai.

Ya ten n gu buri mi kyat sen mi jan du hkra manu rawt taw ai raitim, dut jaw na masha n nga ai daram re lam ginra masha ni tsun ai.

Hka kaba, sharut gyi ai majaw matut mahkai lam ni hten mat nna kaga ginra de na n gu mari sha na mung yak hkak mat ai lam re.

Bai nna hkarang yi madung galaw ai dai ginra hta marang matut manoi htu nna yi n lu nat ai majaw du na shaning hta mung n gu matut yak na re hpe ginra masha ni tau myit tsang nga ma ai re.

Hkawnglanghpu mungchying rapdaw dat kasa Slg. Amosi gaw n gu lusha yak hkak nga ai mungshawa ni hpe mungdaw asuya kaw nna garum jaw na matu May 26 ya shani Naypyitaw Munghpawm rapdaw hta tang madun wa sai re. Dai hta asuya ‘tsinyam hkye mawai hte shara jahkrat magam dap hkringmang’ Dr. Win Myat Aye gaw Hkawnglanghpu mungshawa marai 11967 hpe n gu garum jaw na matu kyat 53,851,500 hpe Jinghpaw mungdaw asuya ‘duhkra ladaw hpyen garum gahtau hpung’ de shalai jaw sai lam sanglang dan sai re.

Jinghpaw mungdaw asuya kaw nna Hkawnglanghpu ginra de sa gawan na tsun wa tim, matut mahkai lam n kaja ai majaw n lu du shi lam chye lu ai.

Posted in: