Myen-KIA ginra lahkawng e gap hkat nga

Daini Myen asuya dap hte Wunpawng Mungdan Shanglawt Hpyendap KIA lapran, Jinghpaw Mungdaw hte Lahta Sam mung ginra lahkawng e gasat gala majan matut byin nga ai lam, KIA ni tsun shateng ai.


Jinghpaw mungdaw dingda Manje (snr Mansi) myo-ne kata Myen hpyen hpung ni hte KIA Dung 27 lapran shara lahkawng e laja lana gasat poi byin nga ai re.

Myen dap Hk.L.Y 276 dap hten mat ai daram byin nga ai Ulang Pa de Hk.M.Y 601 hpyen garum bai du jat wa ai majaw KIA Dung 27 hte dai hpawt jau kaw nna sinat kaba galai gachyai gap hkat wa sai lam, KIA shiga lawk ni tsun ai.

Bai nna, dai hpawt jau kaw nna Mung Hkawng hte Kashawng lapran Jau Wawng Pa hta Myen hpyen Hk.M.Y 319 hte KIA Dung 27 ni gasat gala majan byin nga ai lam, KIA shiga lawk matut tsun ai.

Laban, May 15 kaw nna laja lana majan byin wa ai Manje gaiwang hta KIA dap ni hpe, Myen hpyendap maga jet nbungli lahkawng hte May 17 ya shani 2 lang sa htim gap nna, hpang shani bai helicopter 2 hte sa gap ai re.

Bai Lahta Sam mung, Tamungne hte Mungji lapran, Mungji hte grau ni ai Pin Lung maga de mung KIA Dapba (6) npu Dung 2 hte Myen hpyen hpung ni lapran laja lana gasat poi byin nga ai lam, KIA Dapba (6) salang langai Jinghpaw Shiga Dap KNG de tsun shateng ai.

Dai KIA Dung 2 ginra e amyusha rawt malan hpung maga, Arakan Army (AA), Balawng (TNLA) hte Sam hpyen (RCSS) ni mung nga ai re. Myen hpyendap maga gaw Dapnu 11, 55 hte 99 ni shamu shamawt nga ai rai nna, matut nna lahta daw Mungji, Mungbaw, Munggu masawn de bai gayin hkawm wa na masa pru ai lam, lahta na KIA Dapba 6 salang wa tsun ai.

Lahta Sam mung buga masha ni gaw Myen hpyen ni a yu n tsen jep san ai npu asak hkrung ra ai majaw hkawm sa hkawm wa mung yak hkak nga ai lam, ginra buga masha Jinghpaw Shiga Dap KNG de tsun shana wa ai re.

Posted in: