Myen asuya dap, Dapnu 99 hpyen hpung hte KIA Dung 2 gaw Lahta Sam mung Tamungne hte Mungji (Mong Si) lapran Man Yen ngu ai shara hta, May praw 8, mani hkying 3 pm daram e aten kadun gap hkat wa sai re.
Dai shara gaw Manje mare hte ni nawn maga rai nna, KIA Dapba 6 npu Dung 2, Kung 1 ni nga ai shara de Myen Dapnu 99 hpyen hpung htu shang wa ai majaw gap hkat wa ai re lam, Dapba 6 salang langai Jinghpaw Shiga Dap KNG de tsun shateng ai.
Ya ten, Lahta Sam mung KIA Dapba 4 npu Dung 8 ginra Mong Wi maga de gaw amyusha rawt malan hpung shada, Sam hpyen RCSS hte Balawng hpyen TNLA lapran, lai wa sai bat kaw nna laja lana gasat gala majan byin nga ai re. Ndai shada manghkang hpe hpyen masa hte n hparan na matu, UNFC amyusha hpyen masa mung masa daphpawm kaw nna ‘n madat ai ni hpe jawm ahkyak la na re lam’ ja ja sadi jaw tawn ai lapran, ya na zawn matut gap hkat nga ai lam rai nga ai.
Naypyidaw asuya hte hpyendap gaw Lahta Sam mung e Sam hte Balawng lapran ya na zawn manghkang shabyin dat ai zawn, maga mi de Jinghpaw mungdaw de mung Jinghpaw hte Sam Hkyeng lapran manghkang hpajang shakut nga ai lam, hpyen masa yu maram ai ni tsun nga ai re.
0 comments:
Post a Comment