Nambat lahkawng lang Myen hte hkrum shaga ngut ai hpang, KIO N/T Ninggawn Amumadu Salang Kaba La Nan tsun wa sai ga gaw tinang shawnglam dap de matsun ai hte loi shai hkat ai hpe mu lu ai.
Myen hte hkrum ngut ai hpang Slg kaba La Nan tsun ai, “Myen hte simsa lam jahta ai kam mai ai shadang n nga shi ai majaw, shawnglam na KIA hpyendap ni hpe gap hkat jahkring na n matsun shi ai re” nga ai.
 |
| KIO N/T amumadu Salang Kaba La Nan. |
Raitim, ta tut KIA shawnglam hpyendap de shana ai matsun gaw, Slg. La Nan a ga hte shai hkat nga ai re.
June 30 ya shani Lajayang e Myen-KIO salang ni hkrum hkat ngut ai hpang, hpang shani jang (July praw 1) KIO gaw Myen hte gap hkat nga ai masa hpe “gan shagyip kau ai, gan jahkring kau ai lam” galaw sai re.
KIO/KIA ginjaw kawn Jinghpaw Mungdaw hte Lahta Sam mung tinang shawnglam dap yawng de matsun dat ai gaw, “Mare kaba, lam kaba de sa shangoi, sa gap ai lam naw jahkring” ngu ai lam re.
Bai dai matsun hta “mahkrai kapaw di ai lam naw jahkring na lam hte lai wa ai Myen hpyen ni hpe n hkap gap na lam” mung lawm nna, de a lachyum gaw, “Shanhte (Myen ni) n lung wa yang gaw, KIA kaw nna sa gap na masing n nga mat sai” re lam hpe KIA hpyendu ni tsun ai.
Ndai matsun a majaw ya ten shawnglam hta du nga ai KIA hpyenla ni hkring sa aten lu nna nkau kabu pyaw nga ai lam, KNG sagawn chye lu ai.
Ya matut nna mung Myen hte masum lang bai hkrum na lam hpe Laiza daju na KIO/KIA ginjaw salang ni la nga ai lam chye lu ai. Hkrum shaga na nhtoi hpe Myen de na shana wa na re lam matut chye lu ai.
Matsun a hpang Myen ni madu tawn ai N’mawk Sang Gang hte Bum Sen Post ni hta gap hkat lam ni byin matut manoi byin nga ai raitim, KIA a matsun galai shai lam n nga ai re.
0 comments:
Post a Comment