Lahta Sam mung e daju ai KIA Dapdung 9 gaw Myen hpyen mawdaw yan hpe June 30, bat hpang mali ya shani gap gasat ai lam galaw dat sai re.
Muse-Mandalay Miwa ga jarit hpaga lam kaba ntsa, Mandalay de yan yu wa ai hpyen mawdaw ni hpe Muse a dingda de deng 15 gang ai Homong makau hta buga ten hkying 2 grupyin e bawm, sinat kaji ni hte gap gasat ai re lam, myi-chyaw sakse ni tsun ai.
Si hkrung si htan hkala nba jahpan hkrak n chye lu tim, manghkang byin ai shara na masha 10 lahta hpe Muse tsirung de mawdaw ni hte htaw mat wa ai hpe mu lu ai lam, myi-chyaw mu buga masha ni tsun ai.
Ndai mabyin a hpang, Daknai e daju ai KIA Dung 9 hte de a makau, kanu KIA Dap Ba 4 daju grup gra ni de Myen hpyen ni n-gun jat shamu shamawt nga ai hpe mu lu ai lam, dai ginra na buga masha ni tsun ai.
Lahkawng lang ngu na Myen-Shanglawt salang ni, “simsa lam” n’nan bai galaw na gabaw hta, Jinghpaw mungdaw Lajayang e hkrum hkat ai shani hta sha, ndai mabyin byin wa ai re.
Myen gaw KIA hpe June praw 9 ya shani majan baw hpang ai aten kaw nna, uhpung lahkawng lapran Jinghpaw mungdaw hte Lahta Sam mung ni hta shani shagu ngu na gasat gala lam ni byin nga ai rai nga ai.
0 comments:
Post a Comment