Nam Ya kani dut shabra ai hta Myen pyitusit lawm

Hpakan Lungseng Maw e kani dut shabra nga ai Myen asuya pyada agyi hpe ginra pat jasan hpung ni  rim da nga yang.

Jinghpaw Mungdaw, Hpakan Ginwang Nam Ya pyitusit hpung gaw mare kata kani nanghpam dut shabra ai kaw shanglawm nna, maga mi de KIA hte n tsen ai ni hpe mung jahkrit shama rim jep nga ai lam chye lu ai.

Myen asuya hpaw ya ai Nam Ya pyitusit hpung hpe U Sai Ting Awng woi ningbaw ai re. Shanhte a hpyen hking hta Myen hpyendap Dingdung Daw Daju (M.P.Hk) dazik hte maren sha ‘ndan pala’ kumla lang tawn ai.

Pyitusit hpyen ni nan kani nanghpam lusha sha nga ai, bai nna mare kata madung kani hpraw, kani chyang hte ya-ma tsi chyep ni wanglu wanglang dut shabra nga ai ‘Gan-Dawin’ shat seng hpe ya du hkra rim ahkyak la ai lam n nga, shimlam mahtang jaw nga ai lam buga masha ni tsun wa ai re.

Dai hta n-ga mare kata ‘KIA, Mungshawa Hpyen Hpung MHH’ ngu n tsen ai ni hpe mung jahkrit shama rim jep nga dingyang re lam ginra masha ni Jinghpaw Shiga Dap KNG de tsun ai.

Pyitusit ni ndai lam galaw nga dingyang re majaw, mare masha ni hkrit tsang nga ma ai lam chye lu ai.

Jinghpaw mungdaw kata mungshawa ni gaw kani nanghpam pat jasan masing hpe n-gun dat galaw nga ai ten, dai hpe Myen asuya pyitusit hpung maga ninghkap nga ai lam re.

Posted in: