Taiwan mung Nnang Nawn kaba hkrum

Taiwan Ndum Kaba, Feb 6, 2016

Dai hpawt jau naw yup nga ten, Taiwan mung dingda Tainan mare kaba e Richter scale 6.4 n-gun nga ai nnang nawn kaba ashun wa ai majaw nta htap tsaw ni du hkra ga-nga daw wa nna, masha si hkala lam ni byin nga sai.

Ya ten du hkra marai 4 si ai lam lu shateng nhtawm hkala hkrum ai 100 jan ai lam chye lu ai. Matut nna, garum gahtau hpung ni gaw nta kata matep jam jau hkrum nga ai ni hpe aten dep hkye shaw nga dingyang re.

Feb. praw 8 Miwa Shaning Ningnan du na lahkawng ya hta, ndai n’nang nawn byin wa ai rai nna mabyin shara na masha law law nta n lu mat na rai nga ai re.

1999 ning, Taiwan mungdaw ga-ang Richter scale 7.6 n-gun nga ai nnang nawn ashun ai majaw masha 2,300 jan si hkrum wa sai re. Taiwan mung gaw lamu ga lasa (tectonic plates) lahkawng matut ai shara hta nga ai re.

Posted in: