Asak shimlam tsang ra nna Kambaiti PJS hpung bai nhtang

Kani yi lu hkyen ai sha Kambaiti, Maw si Tung ginra na Pat Jasan hpung bai nhtang

Asak shimlam tsang ra na masa a majaw Myen asuya jarit sin dap (BGF) hte Pyitusit ni uphkang ai Kambaiti ginra Maw Si Tung kani sun kaba e du nga ai Pat Jasan, PJS hpung, mani February praw 5 hta bai nhtang wa sai re.

Kani yi madu tsa kahtap gaw, PJS hpung ni du wa ai hte shanhte hpe wang shinggrup da ai gaw pe 300 daram du hkra ni kahtep wa nna lahpraw hte gap, nlung hte kabai rai ninghkap gasat ai lam ni laja lana galaw wa ai majaw, PJS hpung hpe Waimaw de dawm htingnut la ai re lam, PJS ningbaw ni KNG Jinghpaw Shiga Dap de daini tsun shateng ai.

Ya na zawn kani yi madu ni ninghkap gasat ai hta, PJS masha mali hkra machyi hkrum mat ai lam, maga mi de PJS ni bai matai htang ai hta kani yi madu marai 2 mung hkra machyi ai lam, PJS ningbaw ni hpe lakap let chye lu ai.

Kani yi madu ni gaw PJS ni nga ai dabang de shang nna di mala hka wan ni adup jahten ya ai sha n nga PJS ni lang ai mawdaw pat ni mung adup ga kau ya ai lam, matut chye lu ai.

Hkristan nawku hpung ni woi awn ai PJS hpung, n-gun 300 daram gaw February praw 2 Bat Lahkawng Ya shani ndai Kambaiti ginra kani sun eka hkying kahtap nga ai Maw Si Tung de du shang wa ai re.

Mungdaw asuya pyada 20 jan hte Myen hpyendap Myitkyina daju Dingdung Daw Daju (M.P.Hk) npu Chipwi Byu-ha kaw nna shimlam lit la ya ai raitim kani sun madu ni a grau grau ninghkap gasat ai lam ni hpe n hkum pat ya lu ai lam, PJS ningbaw ni tsun ai. Bai nna, asuya shimlam ni lamu de sinat gap kapaw jahkrit ai raitim PJS ni hpe lahpraw hte, nlung hte gap gasat ai lam ni gaw n yawm mat ai sha grau she kaba wa ai lam, PJS ningbaw ni tsun ai.

Ndai ten Maw Si Tung de asuya shimlam jahtat ya na matu, PJS hpung gaw mani Jinghpaw Mungdaw asuya hpang de laika hte lajin tawn ai lam chye lu ai.

Maw Si Tung e kani eka 15 daram hpe sha naw hkyen kau lu nna nhtang wa mat ai raitim masing hpe jahkring kau ai n re lam, Waimaw kaw du nga ai PJS ningbaw langai KNG Jinghpaw Shiga Dap de tsun ai.

Ya ten, Hkahtawlik Nawku Hpung (RCM) Waimaw Jau Ginwang, Wa Jau Zukdaw Zung Ting woi awn ai n-gun 1,000 jan, PJS hpung gaw Chipwi lam Shangaw Krung de na kani yi ni dan shamyit nga ai re.

Posted in: