(Dai ni hkyak hkyak byin nga ai gasat gala majan ten Chyurum Wunpawng Sha ni hpang de, Rudi Sai a awng ninglaw ga....)
1. Gasat gala lam hpe n ra sharawng tim, hpang jahtum koi yen nmai ai mabyin masa a majaw, gasat gala lam hta ap nawng nga ai Wunpawng Mungdan Shanglawt hpyen ma, hpyen gyi, hpyen du, du kaba, Du up, Du up Daju hte Du Up Daju Jum ni hte Wunpawng Mungdan Shanglawt Asuya magam gun kaji kaba ni hpe Tengman rap ra lam (justice) hte Shinggyim manu (human value) hpe tsawra ai Yehowa Karai Kasang tut nawng bau sin ya u ga akyu hpyi nga n’ngai law. Dai hte maren, anhte hpe “Padang Hkrunlam Majan Masing” hte rau, awng dang lam jaw ya mi ga, mung anhte amyu hpe amyu shatai la ai Yehowa Karai Kasang kaw akyu hpyi nga n’ngai.
2. Lai wa sai ten ni hta Shanglawt Asuya a ntsa Wunpawng mung shawa ni a chye na shut ai lam, tang ndu dum ai zawn re lam, jahpoi asawng ai lam ni law law ngai lai wa sai hpe maram lu ai raitim, dai ni na aten hta, mungkan ting hta nga ai Jinghpaw Wunpawng amyu sha ni yawng gaw, tinang nga ai shara kaw nna dep hkap mai byin ai mahkrun masa ni hku nna, amyu hte mungdan a matu shakut shaja, shamu shamawt shanglawm nga ai hpe mu mada lu ai majaw, kabu myi prwi pyi she pru wa nngai. KIO hte KNO yan jawm pawm ta gindun ai lam a majaw mung mungkan ting Kachin amyu ni a tsin-yam lam ni hpe mungkan de aten dep tang madun lu nga sai hpe mu lu nna myit dik nga n’ngai.
3. Amyu sha ni hta “sai ga shaga ai gaw dai ni rai sai..” Anhte a sai ni tinang du nga ai shara kaw na marawn nga sai.
4. Nawku makam masham lam hku hte kaga lam amyu myu hku n bung hkat nga ga ai raitim, anhte amyu sha ni gaw, “nsen langai, lit langai, sai langai hte langai sha re ai Yehowa Karai Kasang” kaw makai hkak let, ninggun shabawn nna anhte a rudi maka, htinghput htingra, ahkaw ahkang hte mungdan lamu ga hpe makawp maga na lit kaba gaw dai ni adan aleng anhte a shawng e rai nga sai. Kaji kajaw re ai shai hkat ai lam ni a majaw daw hka ninghpang n shatai na sha na chying ahkyak nga mali ai.
5. Hpyen masa hta hkan nna anhte a KIA ni myo kata mare kaba hkan de bawm noi kapaw hkawm ai majaw, kaga mare masha ni nga yak wa na re. Jinghpaw ni grau nna yak wa na re. Dai majaw, hpung sara ni, nawku hpung ni n sim n sa akyu hpyi ga. Myit masin bang let aja awa akyu hpyi nga ga. Kaja wa myit masin lawm nna shawa daw tsa a akyu hpyi nsen gaw teng sha n hkru n hkra lam hpe n myit mada ai lai hku awng padang lu na re. “Ga da, Ja da” ngu ai gaw, shinggyim masha a n-gup aga, nsen ni hta Hpan Sagya wa gaw shabyin lu ai power bang da ya ai lachyum re. Dai majaw, myit masin san seng ai hte shapraw dat ai nsen ni hta shabyin lu ai power lawm nga mali ai. N sim n sa akyu hpyi nga ga.
6. Shawng lam de nga ai anhte a KIA/O magam gun ni, lam n-yit ai sha, Karai Kasang hte n hka ga. Majan rawt na shagu akyu hpyi ga. Bawm noi na rai shagu akyu hpyi ga. Sinat kapaw dat na rai shagu, mara n lu ai ni hpe n hkra u ga, ngu akyu hpyi ga. N si ging ai wa hpe n sat ga. Karai Kasang anhte hpe awng padang jaw na re.
7. Wunpawng amyu sha ni, “NSEN LANGAI, MAGAM LIT LANGAI, SAI LANGAI, YEHOWA KARAI LANGAI” hte tengman ai majan hta shang lawm ga law..
By: Rudi Sai
0 comments:
Post a Comment