KIO Laiza de hpyen yen masha ni, du jat nga dingyang

Jeyang Hka dabang n'nan de du wa ai tsinyam masha ni.

Jinghpaw mungdaw a sinpraw hkran, Miwa ga jarit KIO ginjaw Laiza de mung shawa hpyen yen tsinyam masha ni, shani shagu ngu na du jat nga dingyang re lam tsinyam lakawn lanawn hpung ni tsun ai.

Laiza muklum kata nga tsinyam dabang ni hta masha chyat mat ai majaw, bai du jat ai tsinyam ni hpe Jeyang Hka dabang n’nan de shara jahkrat ya nga ai lam, lit nga KIO du salang ni kawn chye lu ai.

Jeyang Hka dabang e nga shara ginsum ni n law ai majaw ginsum ni bai gap jat nga sai hte, dai ginsum ni ngut jang gaw tsinyam masha n’nan ni sha n ga, Laiza muklum kaw nga ai tsinyam yawng hpe mung htawt sit na re lam, KIO Hpyen Yen Lakawn Lanawn Komiti a ningbaw Salang kaba Doi Pi Sa sanglang wa ai.

KIO hta tawn ai hpyen yen masha jahpan hte maren, dai ni bat Masum Ya du hkra, Laiza Muklum dabang kaw 4,800 jan, Jeyang Hka dabang kaw 3600 jan, hte Hpunlum Yang dabang kaw 700 jan, re.

Maga mi de Myen asuya up hkang ai Waimaw, Myitkyina, N’Mawk hte Manmaw mare de du nga ai tsinyam masha yawng 10,000 daram rai nna, shanhte hpe lit la garum jaw ai hta, Metta Development Foundation (MDF), kaga mung kata NGO uhpung uhpawng ni hte J.W Hkristan nawku hpung ni re lam, sagawn chye lu ai.

Bai nna, Jinghpaw mungdaw dingdung maga---  N’Jang Yang, Sumprabum hte Hkawnglanghpu ginra ni hta mung hpyen hprawng masha ni 10,000 hkawt nga ai raitim, kade a garum ntum mung n hkam la lu shi ai lam, KIO salang ni hku chye lu ai.

September 20, bat Lahkawng Ya du hkra na KIO ginra ni de du ai tsinyam masha jahpan ginchyum hte maren, yawng 21,361 tup re lam, Salang kaba Doi Pi Sa tsun ai.

Ndai tsinyam masha ni gaw Myen-KIA dinghku majan a majaw, tinang a dum nta, yi sun hkauna hte yam nga dusat ni kau da nhtawm, shanhte shim dum ai KIO ginjaw Laiza de hprawng yen ai lam rai nga ai.

Posted in: SHIGA