Myen hpyen n-gun 200, KIA ginjaw maga mayun du nga

Lai wa sai June shata kaw nna Myen hpyendap a zing la hkrum ai KIA Bum Sen post.

 Myen asuya hpyen n-gun 200 daram gaw Jinghpaw mungdaw KIA ginjaw ginra makau de mayun du nga sai lam, ndai lam chye tawn ai buga masha ni tsun ai.
Buga masha ni tsun ai hta, ya ten ndai hpyen hpung gaw Nam San Pa lahta, Hka La Yang mare ding makau Dum Bang Bum kaw Sept. 8, mani bat Mali Ya jahpawt daram kaw nna du nga sai re, nga ai.


Lai wa sai 1989 ning, Myen dap ni KIA ginjaw dingsa Nahpaw-Pajau hpe zing la ai shaloi mung, ndai bum kaw amyawk shadun gap yu sai re lam, matut chye lu ai.

Dai re majaw, ya na KIA ginjaw ginra, Laiza, Alen Bum, Hpalap Bum Dapnawng Daju hte Laisin Bum ni hpe zing na masing hta mung ndai Dum Bang Bum gaw hpyen masa hku ahkyak ai shara re lam, hpyen masa yu maram ai ni tsun ai.

Bai nna ya ten, N’Mawk mare makau Wawang Kumbang kaw mung Manmaw de na Myen hpyen n-gun ni htu tawn ai lam, buga masha ni hpe lakap let chye lu ai.

Maga mi de, Myen gaw KIA Dapba 3 hte Dapba 4 kaw nna Ginjaw hte matut ai hta ahkyak ai hkyet, KIA Sang Gang hte Bum Sen post lahkawng hpe mung lai wa sai June shata kaw nna ya ten du hkra zing madu la tawn ai re.

Lama na Dum Bang Bum kaw mayun du nga ai Myen hpyen hpung gaw KIA ginjaw ginra de shang na shakut wa yang gaw, gap hkat lam ni byin wa mai ai lam, buga masha ni tsun ai.

Lai wa sai June kaw nna ya ten du hkra, KIA ginjaw kawn tinang shawnglam dap ni hpe matsun ai lam maren sha rai nna, dai gaw Myen dap ni hpe da sang htim gasat na ahkang n jaw ai sha, tinang ginra de shang wa ai ni hpe sha ninghkap gasat na matsun tawn ai lam re.

Posted in: SHIGA