Myen hte Shanglawt byin ai Mohnyin, KIO Mungnyang ginwang, Sinbo gasat poi hta, Myen de na marai 17 hkrat sum ai lam chye lu ai.
Kalang bai gap hkat jahkring gabaw hte, Myen ni shagun dat ai Wunpawng Amyusha Rapdaw (WMR) salang 4, Myitkyina kawn Shanglawt ginjaw Laiza kaw du nga ai ten, ndai Sinbo gasat poi byin wa ai lam re.
Hkrat sum ai Myen hpyen ni hta, jahpawt daw hta marai 5 rai nna, shani ga-ang hpang pyen 1:30 p.m. kaw na byin ai gasat poi hta marai 12 kahtap hkrat sum ai re lam, lit nga KIA hpyendu ni tsun ai.
Bai, hkala hkrum ai hpyen la ni nga tim, kade re hkrak n chye lu ai. Dai hte maren, KIA maga mung hkala nba jahpan n chye lu shi ai.
Ndai gasat poii gaw, Sinbo daju Hka-La-Ya masat 141 hte Sinbo makau Pang Hkawn daju KIA Dung 5 lapran byin ai re.
Ndai Myen dap gaw Dung 5 makau shara la tawn ai kaw nna May 25 ya shani hpang, hpang de deng mi jan tsan ai shara de bai htawt sit ya ai re.
June praw 9, Sang Gang e Myen-KIA gasat poi byin hpang ai kaw nna Jinghpaw hte Lahta Sam mung shara shagu ni hta gasat poi ni, nhtoi 10 ya matut manoi byin wa ai re.
Majan a majaw hte Myen hpyen ni a porter rim hkrum na tsang ai majaw, ya ten Miwa gajarit gin ra mali--- Laiza, Maijayang, Loije (Nawng Dau) hte Ura Bum ni de hpyen hprawng mungshawa 10,000 jan du wa sai lam, KIO Mungchying Uphkang Dap tsun ai.
Ya ten, Laiza kaw dabang 6 hpaw nna hpyen hprawng 2,000 jan hpe KIO kaw nna lanu lahku nga ai lam chye lu ai.
0 comments:
Post a Comment