KIO/KIA ginjaw Laiza hpe gasat zing la na ahkang hpyi ai hku nna, Myen lahta tsang hpyendu ni gaw, Miwa hpyendu ni hte Yunnan mungdaw Mangshi e June 23, bat mali ya shana mayun sa hkrum sai lam, Mangshi shiga lawk tsun ai.
Zuphpawng de Yunnan mungdaw lahta tsang du salang ni hte, Myen de na Lashu daju Sinpraw Dingda Daw Daju (Ya-Ma-Hka) hte Naypyidaw na lahta tsang hpyendu ni shanglawm nna, shawng de KDA, ya, Kawnghka daju n-gawn hpyen du salang ni mung sa du lawm ai lam, chye lu ai.
 |
| KIO Ginjaw Laiza Muklum. Sumla: Kachin News Group |
Dai hpawng hta, Myen gaw Miwa hpe Shanglawt Ginjaw Laiza gasat zing la na masing hta, Myen hte KDA N’gawn hpyen ni Miwa ga jarit hta pru pru shang shang galaw lu na hte, hka lam (gara hka hkrak n chye) hku nna Miwa ga jarit de lai rap lu na ahkang ni hpyi mat ai lam, ga jarit Miwa shiga lawk tsun ai.
Miwa gaw shi a polisi hte maren “kaga mungdan a dinghku manghkang kaw n shang shuk lawm na re lam” tsun tim, tinang lamu ga jarit hta Myen hpyen hte KDA n’gawn hpyen ni pru-shang galaw lu na ahkang gaw jaw dat sai lam, chye lu ai.
Matut nna Myen gaw Miwa hpe, “Tinang Myen dap hku nna Laiza hpe gasat la ai rai yang, sai gin hka gasat shamyit ai masa (lu-myu-ye) byin wa chye ai majaw, Jinghpaw shada re ai KDA n’gawn hpyen hpe woi awn gasat shangun ai majaw, sai garan masa byin na n re sha, shada bawngban lam mung byin pru wa na re” nga na, sanglang dan sai lam, matut chye lu ai.
Ndai zawn Miwa ahkang jaw sai hte, KDA n’gawn hpyen ni (hpyen n-gun masat tawn ai lam n nga), KIO ginjaw Laiza hte Dap Ba 3 hpe gasat la na, June 25, bat kru ya shani Jinghpaw mungdaw de rawt mat sai lam, n’gawn hpyen hpe lakap let chye lu ai
Dukaba Mahtu Naw woi awn ai KDA gaw 1990 ning hta kanu KIO/KIA na ga garan pru mat ai re.
June praw 8 kaw nna Myen hte Shanglawt majan byin hpang ai hta, Jinghpaw mungdaw, Manmaw Ginwang, N’mawk Ninghtawn, KIA Dap Ba 3 npu Dung 15 ginra, KIA Sang Gang Post hte Bum Sen Post ni hpe ya ten du hkra Myen hpen madu la tawn ai re.
0 comments:
Post a Comment