Australia mungdan kaw shanu nga ai, Jinghpaw Wunpawng myusha ni kawn, Myen hte Miwa mungdan asuya Sumtsan Kasa Rung shawng kaw, majan ninghkap n-gun madun ai lamang June 24 ya shani galaw sai re.
Australia mungdan, Melbourne, Sydney hte Brisbane mare kaba ni kaw du nga ai, Jinghpaw Wunpawng myusha 60 daram gaw, mungdan a mare daju Canberra kaw nga ai, Myen hte Miwa mungdan asuya Hkringmang Rung shawng kaw, ninghkap n-gun madun ai lam galaw wa ai rai nga ai.
 |
| Australia mungdan kaw du nga ai J.W sha ni ndai zawn ninghkap n-gun madun nga yang |
Myen de hpyi shawn ai gaw, Jinghpaw mungdaw hta, majan gasat ai lam ni jahkring nna, simsa ai ladat hte mung masa manghkang hparan na matu, Jinghpaw mungshawa a ra kadawn ai hpe mungkan kaw na garum wa hkra galaw ya na matu, Jinghpaw mungdaw kaw na, Myen hpyendap ni dawm kau na matu hte, mungkan ting na Jinghpaw ni hte myit ra sharawng ai lam gaw langai sha re hpe tsun dan ai lam rai nga ai.
Miwa asuya Sumtsan Kasa Rung hpe hpyi shawn ai gaw, Myen asuya hpe madi shadaw ai lam ni, hpaga rau jawm galaw ai lam ni dawm kau na hte hpyen hprawng ni hpe Miwa mung kata de shang na ahkang jaw na matu hpyi shawn wa sai rai nga ai.
Wunpawng Mungdan Shanglawt Hpyendap (KIA) hte Myen asuya hpyendap a lapran, lai wa sai June shata praw 9 ya kaw na, dinghku majan bai byin hpang wa sai hte, ya ten Miwa mung ga jarit de hprawng shanu wa ai, hpyen hprawng 20,000 wa sai rai nga ai.
Hpyen hprawng ni hpe KIA kawn garum jaw nga ai raitim, aten galu a matu garum jaw na n mai byin ai hte, mungkan shara shagu kaw na, wuhpung ni hku nna, garum jaw na matu KIA salang ni tsun wa sai re.
Ya ten du hkra, shinggan kaw na, garum ningtum ni n du shi ai hte, KIA kawn, hpyen hprawng langai hpra hta lani mi n-gu kawk lahkawng garan jaw nna, madi shadaw nga ai hte, buga kata kaw daju ai NGO hpung kawn, tsi gawn lajang ai lam ni galaw nga ai hpe chye lu ai.
0 comments:
Post a Comment