Miwa ga jarit de tsinyam masha 10,000 mi jan du

Hpyen majan koi yen ai tsinyam masha J.W myusha 10,000 mi jan Miwa ga jarit ni de du shajang nga sai hte, matut nna mung du nga dingyang re lam chye lu ai.

Hpyen hprawng ni gaw June 9 ya KIA hte Myen hpyen ni lapran majan byin nna dinghku majan de gale wa ai majaw, Miwa ga jarit makau de hprawng shingbyi nga ai lam re.

Laiza de du nga ai Myen ginra na tsin-yam masha ni hpe KIO kaw nna malu masha hte tsi mawan ni garum jaw nga ai.



Doi Pyi Sa tsun ai, “Mani hta shinggyin da ai, anhte a jahpan hku rai yang, masha 2,291 gaw, Laiza kaw du nga sai. Bai, 300 jan gaw Ura Bum, 4,238 gaw Loije maga, 2,000 jan gaw Man Win hte 300 jan gaw Maijayang kaw du nga sai re.”

Ya KIO gaw Laiza e dabang 6 hpaw nna Myen ginra na Laiza de hpyen majan koi yen ai mungmasha ni hpe hkap la nga ai re.

Tsinyam malawng gaw, Myen asuya up hkang ginra ni kaw nga ai, mare ni kaw na rai nna, dai mare ni gaw, Myitkyina hte Manmaw lam lapran, Manmaw hte Loije lapran, Manmaw-Kai Htik-Nam Hkam lam lapran hkan nga ai mare ni re lam, Salang kaba Doi Pyi Sa tsun ai.

KIO up hkang ginra rai nga ai, Laiza hte Maijayang mare lahkawng kaw na tsinyam ni hpe, KIO kawn, malu masha, tsi mawan hte hkamja lam hte seng ai makawp maga ai lam ni, galaw ya nga ai rai nna, buga kaw na snr mungdan gadaga kaw na tsiyam makawp maga hpung langai mung, dai shara de ndu shi ai lam chye lu ai.

Tsinyam ni tsun ai gaw, majan hpe hkrit ai hta, Myen hpyendap kawn porter lahkawn na hkrit ai majaw, Miwa ga jarit de hprawng yen wa ai re lam tsun wa sai.

Posted in: SHIGA