June 23, mani bat mali ya shani KIA Dung 12 hte byin ai Sin Hkan manau gasat poi kadun hta, Myen hpyen marai 3 hkrat sum ai lam, shawnglam ginra na mung masha ni tsun ai.
KIA maga hkala nba kaga mi n nga ai lam, Dung 12 na hpyendu ni hpe lakap let chye lu ai.
Mabyin gaw, Tsa-Ka-Hka (Military Operation Command)-3 npu Mugawng Myen dap Hka-La-Ya 74 hte KIA Dung 12 na dap daw ni, Manje ninghtawn Sin Hkan makau kaw hkrum hkat nna aten minit 20 ram gap hkat wa ai lam re.
Gap hkap ngut ai hpang Myen hpyen mang 3 hpe Gawng Run kahtawng de hpai mat wa sai lam, myi-chyaw-mu buga masha ni tsun ai.
Ndai Myen dap gaw shawng e Hpakan de shawnglam hkawm ang ai ten, Seng Tawng mare hta KIO Seng Zup ninghtawn salang lahkawng--- Maraw Brang Mai hte Salang Kaba La Seng yan hpe March 24 ya shani rim ai dap mung re.
0 comments:
Post a Comment