J.W hpyen hprawng 20,000 jan Miwa ga jarit de du

Myen hte Shanglawt lapran byin nga ai hpyen masa manghkang a majaw, J.W hpyen hprawng masha 20,000 jan ya ten Miwa ga jarit ni de du nga sai hte, matut hprawng shang nga dingyang re lam chye lu ai.

Ya ten KIO ginjaw Laiza e hpaw tawn ai hpyen hprawng dabang 6 hta du nga ai masha gaw, June 21 ya jahpan hte maren, marai 13,000 jan re. Dabang ni hpe Myu Lawt Wunli gawknu, Manau Wang, Masat 3 gat lawk, Hpung Lung Yang hte Nawng E Hku ni kaw hpaw tawn ai rai nga ai.

KIO kawn, tsin-yam langai hpe lani mi n-gu kawk lahkawng garan jaw nga ai hte, hkam ja lam a matu, buga kata na asuya n re ai NGO hpung nkau lit la garum jaw nga ai lam chye lu ai.

Myen a roi rip lam hte porter woi na tsang ai majaw Laiza hpyen hprawng dabang langai kaw du nga ai J.W hpyen hprawng ni.

Bai, Waimaw mare Hpungkyi jawng hte Hkristan sasana wang ni de hprawng shingbyi nga ai masha yawng mung 800 jan re lam, hpung sara langai tsun ai.

Loije, Miwa mung hkran na La Ying mare kaw ya ten, hpyen hprawng masha 5,000 daram du nga sai hte, Mahtan mare de hprawng shang wa ai ni gaw, 150 jan rai sai lam, chye lu ai.

Nam maling kata hkan hprawng yen nga ai hpyen hprawng buga masha ni gaw, hkali hkawaw, kan machyi ana ni byin nna, jam jau nga ai hte, marang matut manoi htu ai majaw mung, marang prang npu kaw jam jau ai hte nga ra ai lam chye lu ai.

Miwa gajarit de hprawng yen wa ai, hpyen hprawng tsinyam ni malawng gaw, Myitkyina, Manmaw hte Loije lam lapran na, buga masha ni re ai hte ya ten tsinyam 20,000 jan KIO uphkang ginra de hprawng shanu nga sai lam chye lu ai. Nkau mi gaw, Laiza makau na Miwa hkran maga de hprawng yen nga ai re.

Lai wa sai June praw 9 ya shani kaw na Myen-KIA gap hkat bai hpang wa ai hta, ya ten KIA ni Myitkyina mare de shang nna asuya rung ni bawm kapaw ai madang de du wa sai rai nga ai.

Posted in: SHIGA