 |
| Jinghpaw pati hte Jinghpaw mungdaw saumla |
Jinghpaw mungmasa pati masum hpe pati kaba langai hku pawng gahkyin kau na matu bat Kru Ya shani mungdaw mare daju Myitkyina e galaw ai zuphpawng hta masa hku myit hkrum sai re.
Tinang J.W mungchying mungshawa ni hpyi lajin ai hte maren, Kachin State Democracy Party (KSDP), Kachin Democratic Party (KDP) hte the Kachin National Congress for Democracy Party (KNCD) ni hpe pawng gahkyin nna n-gun kaba ai pati langai hpaw sa wa na lam re.
April praw 2 ya shani Du Mare, KDP pati rung e galaw ai zuphpawng hta pati pawng gahkying ai lam ta tut hkrang shapraw na matu, pati langai na marai 5 hpra shanglawm ai, malawm 15 Shabyin Shatai Komiti hpe mung hpaw dat sai re lam, KDP ningbaw Slg. Gumgrawng Awng Hkam tsun ai.
Ndai zuphpawng hpe pati masum na ningbaw ni woi awn galaw ai hte, KSDP ningbaw Dr. Manam Tu Ja, KNCD ningtau ningbaw Dr. Chyauchyi Awng Dun hte KDP ningbaw Slg. Gumgrawng Awng Hkam ni sa du ai re.
Matut nna kaga Jinghpaw (Kachin) pati lahkawng, Lisu National Development Party (LNDP) hte Lhaovo National Unity and Development Party (LNUDP) mung ndai pati pawng gahkyin lam hta shanglawm na matu ntsa lam jahkrup tawn ai lam chye lu ai.
Jinghpaw pati ni yawng pawng gahkyin nna ra lata poi shang na matu Mungshawa Nsen Shapraw Komiti-Hpakan Ginwang gaw maning 2015 November ra lata poi n du shi ai aten atsam htum hkra shakut yu sai. Shanhte hku nna pati n pawng jang Jinghpaw me bra mat nna gara pati mung me dang na n re lam hpe ja ja tsun shadum wa sai re.
Raitim KDP pati hta lai ngam ai pati lahkawng n hkap la ai majaw pati pawng gahkyin lam mung n byin mat sai. Dai hpang ra lata poi san san shang yu ai hta, tinang Jinghpaw mungdaw e Amyusha Democracy Ginjaw Pati, NLD mahtang me dang mat ai re.
Jinghpaw pati ni pawng gahkyin ai lam gaw ra lata poi dang na matu sha n re sha mungmasa hku nna mung n-gun gahkyin na ahkyak ai lam hpe ya pati ningbaw ni mu mada hkap la wa ai masa re lam KDP pati ningbaw Slg. Gumgrawng Hkam tsun ai re.
0 comments:
Post a Comment