Hka jaw poi ngut ai hte Myen dap KIA hpe bai gasat

shawng lam na Myen hpyenla ni

Hka jaw poi (Thinggyan) ngut ai hte Myen asuya dap gaw Wunpawng Mungdan Shanglawt Hpyendap KIA ginjaw Laiza shawnglam post langai hpe Mani April 17 Laban shana maga shang gasat wa sai lam chye lu ai.

Myitkyina-Manmaw lam ntsa Nam San Yang sinna maga KIA Dung 18 npu Mung Shawa Hpyen Hpung MHH ni nga ai Pau Se, shawnglam post kasha langai de asuya dap ni shang wa ai majaw gasat poi byin wa ai re lam, KIA Dukaba Naw Bu Jinghpaw Shiga Dap KNG de tsun ai.

Gasat poi byin ai hta lahkawng maga hkala hkrum ai nga tim kata lam gaw n lu tang madun shi ai lam shi matut tsun ai.

Asuya dap gaw Myitkyina-Manmaw Lam dingyang mare rai nga ai Nam San Yang, Gang Dau Yang hte laga mare hkan ngam nga ai mung shawa ni hpe ndai April shata hta lawan ai hku yen na lam ndau da sai lam chye lu ai.

Dai hta majan bai byin hpang wa ai ten Myitkyina kaw nna Laiza sa ai hta jai lang nga ai Maisak Pa lam hpe mung ndai shata praw kaw nna pat kau sai lam chye lu ai.

Myen hka jaw poi n du shi ai bat mi daram April 7 hte 8 hta asuya gaw KIA ginjaw Laiza makau dung 18 Sut Shang Post hte Nbu Kawng Post hpe gasat zing la kau sai re.

Ndai lang gasat ai gaw Myen shaning ningnan hta asuya hku nna KIA hpe shawng ningnan lang gasat ai lam rai nga ai.

Posted in: