KBC srn yan hpe roirip sat ai tara hkam shapraw lu hkra lusha gam akyu hpyi na

Jan 23, KBC laika hpaji sasana apnawng saranum lahkawng a makoi mayang poi, KBC Ginjaw Rung, Myitkyina

Lahta Sam mung Muse Ginwang Pangsai (Chyu Kuk) ginwang daw Namtau mare Kawng Hka kahtawng na Jinghpaw Wunpawng Hkalup Hpung Ginjaw (KBC) Laika Hpaji Sasana Apnawng Saranum Manran Lu Ra hte Tangbau Hkawn Nan Tsin yan hpe hkum shan roirip nhtawm zingri sat kau hkum ai shata mi hpring ai nhtoi, ladu hkrum ai February 19 ya shani hkying hkum 24 mungdan gadaga lusha gam akyu hpyi na matu KBC kawn ndau shabra dat ai.

Apnawng saranum yan roirip sat hkrum ai manghkang hte seng nna mabyin teng shawk shapraw lu na matu hte hpawn du na February 19 ya manap hkying 6:00 kawn 20 ya jahpawt hkying 6:00 du hkra yawng Dai Madu hta langai sha hkying hkum 24 lusha gam akyu hpyi na matu February 11 ya shani ndau shaba laika shapraw dat ai lam rai nga ai.

“KBC apnawng saranum 2 roirip sat hkrum ai hte seng nna mabyin teng shawk shapraw lu na matu akyu hpyi ai lam hta lai nna laga mahtai n nga mat sai, anhte hku nna gaw Karai Kasang jaw ai nyan hpaji hte atsam marai htum hkra shakut shaja nga ga ai” nga ndau laika hta shaleng da ai.

“Ndai manghkang hpe yawng chye da chyalu re majaw mungkan madang nawku daw jau nga ai makam masham nawku htung hte tinang nga ai shara kaw nna lusha n sha ai sha akyu jawm hpyi na matu re” nga KBC Amu Madu Rev. Dr. Hkalam Samson tsun ai.

Dai hpang tara masa ka-up ai lam n nga ai dai ginra hta manghkang mabyin teng jep shapraw ya na matu mayak mahkak law law hte dingbai dingna law law nga shajang ai re majaw KBC hte arau Myitkyina Hkristan Kongsi (MCC) hta shanglawm ai makam masham nawku hpung shagu lusha gam akyu hpyi na matu ga saw dat ai nga tsun ai.

Mungdan kata amyu sha makam masham, nawku hpung, dinghku shagu a yubak mara ni hpe hpyi nem tawngban na matu, laika hpaji apnawng saranum yan hpe roirip zingri sat ai tara hkam hpe lawan ladan jep shapraw lu na matu, tawtlai shut shai ai ni a malai mara kata mungshawa ni n jawat hkrum na matu, manghkang hte seng nna shawk sagawn ai lam ni, jahkrit shama ai lam ni a majaw grai hkrit gari taw nga ai Namtau hte Kawng Hka mare masha ni hpe akyu jawm hpyi ya na matu hte lawnglam 6 hpe kyu hpyi ding nyawm sit shang na matu ndau shabra dat ai lam re.

Manghkang mabyin teng paw pru wa na matu jep sagawn nga ai lit nga ai ni yawng tengman ai maga de gwi gwi shang tsap lu na matu hte byin lai mat wa sai manghkang ni a marang Karai Kasang a hpung shingkang grau grau dan hkung wa lu matu ni mung lawm ai.

KBC gaw Saranum 2 sat hkrum ai manghkang hpe teng teng man man sawk shapraw lu hkra maga mi kawn garum madi shadaw ai masa hku nna KBC kawn marai (15) shang lawm ai jep sagawn komiti hpe February praw (4) ya shani hpaw ninghtan dat sai rai nga ai.

Posted in: SHIGA