Ginjaw Laiza makau de Myen Asuya Dap ni laknak kaba ni gap

Slg. Lah Nan, KIO ga shaga ahkang lu

Wunpawng Mungdan Shanglawt Hpung (KIO) Ginjaw Laiza shawnglam dap ni de Myen asuya dap kawn laknak kaba ni hte shani shagu gap nga ai majaw lahkawng maga hpyen masa shuk nga ai lam KIO kawn tsun shaga ahkang lu ai Slg. Lah Nan tsun ai.

Ginjaw Laiza makau mayan hkan e Myen asuya dap ni hpyen n-gun jat bang ai lam nga nna February 12 ya shana hkying 6:00 grup yin hta Laiza a sinna dingda daw maga hkan e dung ai Hka Ya Bum, Bum Re Bum, Hpun Pyen Bum hkan na laknak kaba hte 30 lang daram gap bun wa ai hta KIO maga kawn bai shingla gap gasat wa jang gaw majan laja lana byin wa chye ai nga shi kawn tsun ai.

“Ndai laman gaw dingyang ram re ngu mai tsun ai. 11 (Feb) ya jahpawt manap hkying 4 chyen hta mung dai Hka Ya Bum kaw dung ai shanhte Myen asuya dap kaw na 81 MM ngu maram lu ai laknak kaba ni hte 5 lang gap ai. Mani hpawt mung 3 lang gap ai, shana maga hkying 6:00 kawn 6:30 du hkra gaw 30 lang hkawt gap ai. Daini chyawm gap ai lam laga n nga ai” nga Slg. Lah Nan tsun ai.

Dai hte maren February 12 ya hte 11 ya shani hta mung Hpun Pyen Bum e dung ai Myen asuya dap ni kawn laknak kaba 3 lang kawn 5 lang n yawm gap ai lam nga ai nga matut tsun ai.

Ya yang Laiza buga masha ni hkrit tsang nga ai zawn, Myen asuya dap ni gap shingte taw nga ai shawnglam dap makau Alen Bum e hpyen yen jawngma yawng 1,000 hkawt hpaji sharin nga nna kade n na yang san poi htai ra sana re majaw jawngma ni a matu tsang nga ai lam tsun ai.

February 13 ya hta mung Manmaw hte Myitkyina mawdaw lam maga kawn Myen asuya dap ni hpyen n-gun kahtap nna jat bang wa ai lam nga ai majaw majan bai byin wa na masa nga ai nga Slg. Lah Nan kawn tsun ai.

“Majan gaw laja lana byin wa na masa pru taw nga ai. Shanhte madi madun na lam hta KIO gaw simsa lam n ra sharawng ai uhpung re ngu ai lawnglam hte mahtai bai jaw wa na sha re. Dai zawn galoi mung galaw nga ai re. Anhte maga kawn ya du hkra hkap shingla ai lam laga mi n nga shi ai. Shingla dat ai hte gaw majan kaba byin wa sana sha re” nga tsun ai.

Lai wa sai 2014 ning November 19 ya hta mung Laiza lahta yang na Hpyen Du Shalat Jawng de asuya dap a laknak kaba gap ai lam a majaw Hpyen Du Jawngma marai 23 hkrat sum mat sai rai nga ai.

Simsa lam gawgap na matu mungdan ting madang gap hkat jahkring lam awngdang wa lu hkra Mungdan Ting Madang Gap Hkat Jahkring Bawngban Hpung (NCCT) hte arau lata gindun let gawlaw sa wa na matu February 12 ya shani ang ai 68 lang na Mungdaw Nhtoi hta ndau laika shale da sai re.

KIO gaw Myen asuya kawn munghpawm nhtoi lamang lung na matu saw shaga ai lam hpe hkap la lu la sai raitim simsa lam myit hkrum ga sadi la ga ngu ai numshawn hpe myit n hkrum ya ai majaw n lung mat ai rai nga ai.

Posted in: SHIGA