Lusha gadawn ai Hpakan tsin-yam masha ni hpe 88 Jawngma Hpung sa jaw

88 Myen jawngma ningbaw ni Hpakan e lusha gadawn nga ai hpyen yen ni de sa du garum

Jinghpaw Mungdaw Hpakan Ginwang Ginsi mare na Jinghpaw tsin-yam masha ni hpe 88 ban simsa lam hte branglang shinggyim uhpung uhpawng (Jawngma Hpung) kawn malu masha alu sa jaw lu sai nga 88 Jawngma Hpung Ningbaw Ko Mya Ae tsun ai.

February praw 6 ya shani Ginsi mare hte Awng Ba Li (Tang Gau) kahtawng na hpyen yen tsin-yam masha ni hpe Ko Mya Ae woi awn ai jawngma hpung ningbaw ningla ni kawn alu jaw ai ni a garum madi shadaw la ai n-gu buri 1,000 mi hte laga malu masha ni hpe sa du garum la mat ai lam rai mali ai.

Manan na tsin-yam masha jahpan hte shai hkat nga nhtawm shanhte rai n du ten e nkau tsin-yam masha ni gaw ni-nawn ai shara de gadai mung gadai chye ai hku htawt sit mat ai lam hte Bukda hpungkyi jawng kawn hpyen-yen tsin-yam masha ni hpe mawdaw lahkawng hte Awng Ba Li mare de htawt sit kau ai lam ni nga ai majaw yawm taw ai nga Ko Mya Ae kawn tsun ai.

“Hpyen hprawng masha ni ni-nawn ai de htawt mat ai nga yang n law mat ai. Anhte Ginsi Hkalup hpung nawku jawng kaw 700 re ngu shadu ai. Ya gaw 400 jan sha mu ai. Lisu kahtawng kaw gaw 80 kaw na 50 hkawt sha ngam taw ai. Bai langai gaw Hkatawlik nawku jawng kaw mung n nga mat ai. Rai timung mare kahtawng lahkawng na tsin-yam masha ngu mai tsun ai. Hpa majaw nga jang shanhte gaw hkawmsa hkawmwa lam grai yak mat nga gaw” nga shi kawn tsun ai.

Hpakan ginwang Ginsi mare na Jinghpaw Wunpawng Hkalup Hpung, Hkatawlik Nawku Hpung, Lisu kahtawng masha ni hte Bukda Hpungkyi Jawng ni hta nga ai tsin-yam masha ni a matu n-gu buri 800, sau pung 40 hte Awng Ba Li (Tang Gau) kahtawng hta n-gu buri 140 hte sau pung 10 garum da sai nga tsun ai.

Lai wa sai January 15 ya kawn Myen asuya hpyen dap hte Wunpawng Mungdan Shanglawt Hpyen Dap (KIA) Dapba (2) npu Dapdung (6) ni majan byin mat ai majaw Awng Ba Li mare masha ni hte hpawn tsin-yam masha marai 2,000 hkawt gaw Ginsi mare de hprawng yen shingbyi mat ai lam rai malu ai.

Ya yang e, tsin-yam masha hku nna htawt sit bang wa ai masha yawm taw ai raitim Awng Ba Li mare hte Ginsi mare masha ni mung hkawmsa hkawmwa lam yak ai lam nga ai majaw tsin-yam masha ni re nga Ko Mya Ae tsun ai.

“Sang Hka shagyit (gate) ngu ai nga ai. Dai shagyit a madi shadaw laika lawm jang she pru wa mai ai. De majaw malu masha ni sa htaw la na, hkawmsa hkawmwa hte galaw lu galaw sha na matu ram ram yak taw ai. Dai mare lahkawng yan hta nga ai masha yawng hpe tsin-yam masha ngu mai tsun ai” nga tsun ai.

88 jawngma hpung ningbaw ningla ni gaw February praw 7 ya shani Myitkyina mare daju de bai nhtang du wa sai rai nga ai.

Shanhte Hpakan ginwang de rai n sa ten kawn Gumsan Magam Slg. Ting Tsing hpang de tau hkrau ahkang hpyi laika tang da ai majaw Dapnu masat (66) Dapdung ni hte hkrum katup tsun shaga ai aten dut dang ai lam laga n nga ai sha tsin-yam masha ni hpe alu sa jaw lu ai nga Ko Mya Ae tsun ai.

Myen Asuya Dapnu hte KIA lapran majan ningnan byin hpang wa ai ten kawn chyat rawng nga ai dai Awng Ba Li (Tang Gau) mare masha ni hpe Hpakan kawn nawku hpung kanu kawa ni hte Simsa Lam Akyu Galaw Hpung (PCG) ni sa shaga la na matu shakut yu sai raitim Myen asuya hpyen dap kawn ahkang n jaw ai majaw shaga la n mai mat ai lam re.

Jinghpaw Mungdaw Hpakan ginra e majan nhpan kata chyat rawng nga ai tsin-yam masha ni hpe htawt sit ahkang jaw na matu hte shinggyim nauna matsan dum garum madi shadaw lam ni shang lu hkra seng ang ai uhpung wuhpawng ni hpe Mungkan Wunpawng garum ntum lam hte seng ai Myen mung daju a dat kada Ms. Renata Dessallien kawn February praw 5 ya shani ndau laika shapraw dat ai.

Majan a marang matsan jamjau hkrum nga ai Awng Ba Li mare hte makau grup yin mare kahtawng ni kawn mare masha ni Ginsi de htawt sit bang wa ai masha yawng 1,000 jan hta sha n ga majan nhpan hkum hkra nga ai laga mungmasha 1,000 jan mung lawm taw nga ai majaw, Myen asuya dap hte Wunpawng Mungdan Shanglawt Hpyen Dap (KIA) ni a majan gaiwang kata na mare masha ni hpe makawp maga ya na matu hte shanhte hpe shinggyim nauna matsan dum lam hte seng ai tara masan hte maren hkrang shapraw sa wa ya na matu sadi jaw tawn ai.

Posted in: SHIGA