Awng San wa a 100 ning hpring masat dingsat hku nna Jinghpaw mungdaw Myitkyina ginwang hta hkrang bung magri sumla jung da na masing hpe aten rai n rai shi lam Wunpawng Amyu Sha Mungbawng Rapdaw (WMR) kawn Jinghpaw Mungdaw Hkringmang Daju hpang de sadi jaw laika sa dat ai nga WMR Ningbaw Duwa Lahtaw Hkun Seng tsun ai.
“Awng San magri sumla ndai kaw da na matu ya she mungmasa hkrum shaga bawngban taw ai. Panglung ga sadi grin na matu shakut nga ai… hpa ga sadi hpyi n lu shi yang magri sumla hpe Jinghpaw Mungdaw e tawn na ngu gaw myit yu shara re” nga shi kawn tsun ai.
Myitkyina ginwang hta dai magri sumla jung na lam hpe Jinghpaw mungshawa ni masa shai hkat nga nhtawm dai sumla jung na aten rai n rai shi ai lam hte Awng San wa jaw ai ga sadi ni hpring tsup nna Myen mungdan kata jet ai Federal Munghpawm paw pru wa ai shani du hkra dai sumla jung na masing hpe gan jahkring da na matu January 26 ya shani sadi jaw laika sa dat ai lam re nga matut tsun ai.
“Ya gaw Jinghpaw Mungdaw kata lung seng mung ma, hpun ni mung ma mat wa sai. Masha mung ma hten za mat masai. Ya Awng San wa a sumla bai jung na ngu gaw Jinghpaw ginra ni mat mat na masing byin taw ai. Dai majaw anhte WMR gaw Jinghpaw Mungdaw hta manghkang ni naw nga ai. Gan jahkring da ya marit. Aten garai n rai shi ai ngu sadi jaw da ai re” nga tsun ai.
Awng San wa a shangai nhtoi hpe myit dum na matu, 100 ning hpring hte Awng San myit jasat prat shang ngang grin lu na matu ngu ai hpe yaw shada let lai wa sai December 23 ya shani magri sumla jung na ahkang hpe Hkringmang Daju kawn jaw da sai rai nna, du na February 13 ya shani shadun na shara hta wut gaw na matu hkyen lajang da sai nga Awng San sumla shabyin shatai komiti ningbaw Slg. Myat Chyaw Tu kawn tsun ai.
“Anhte chyawm ndai gaw wanglu wanglang dinglun ahkang lu ai nga yang shanhte uhpung uhpawng ni a jasat jasa le i. Anhte gaw amyu sha lamyan re majaw amyu sha yawng hte seng ai Awng San wa a 100 ning hpring masat dingsat mung re. Bai nna Awng San myit jasat ni mungdan hta kalang bai paw pru wa na nga jang mungdan a matu grai hkrak wa na re ngu ai hpe yaw shada ai le i” nga shi kawn tsun ai.
Awng San magri sumla hpe ya yang Mandalay mare hta tawk gyin nga nna 50% shadang gaw ngut kre wa sai re majaw dai magri sumla hpe Myitkyina mare Sama Lam hte Sum Pra Bum Lam Masat (1) Lahta Tsang Jawng jut hta jung na matu re nga matut tsun ai.
Awng San Sumla Shabyin Shatai Komiti gaw Jinghpaw Mungdaw Hkringmang Daju hpang de lai wa sai December 22 ya shani sumla shadun na shara hpyi shawn ai laika tang da nna jung na ahkang n lu shi ai raitim alu tam na ahkang hpe gaw December 25 kawn January 25 du hkra shata lahkawng lu da sai nga shi kawn tsun ai.
Wunpawng Amyu Sha Mungbawng Rapdaw (WMR) gaw Jinghpawng Wunpawng amyu sha ni a mungmasa lamyan hpe bawngban jahkrup na matu hpaw shabawn da ai uhpung rai nna moi gaw Wunpawng amyu sha laknak hpai uhpung uhpawng ni, lauban launa ni hte makam masha nawku hpung ningbaw ni hte hpaw shabawn da ai rai nga ai. Raitim ya yang laknak hpai uhpung uhpawng ni n lawm ai sha amyu lakung shagu kawn ningbaw ningla ni hte hpaw shabawn da ai rai mali ai.
0 comments:
Post a Comment