Simsa lam a matu KIO gaw matut nna lata gindun sa mat na re

Slg. Lah Nan

Simsa lam gawgap na matu mungdan ting gap hkat jahkring lam hta bandung du hkra jawm shakut mat wa na re lam Wunpawng Mungdan Shanglawt Hpung (KIO) gaw daini wa ang ai (68) lang na Munghpawm Nhtoi hta ndau laika shale dat ai.

KIO hku nna shaning law law hkrum sha mat wa sai mungmasa manghkang hpe ginchyum dat kau nhtawm ngangkang ai simsa lam gawgap na matu Mungdan Ting Gap Hkat Jahkring Bawngban Hpung (NCCT) a shakut ai lam awngdang ai kaw du hkra jawm galaw sa mat wa na re lam ndau shale dat ai lam rai nga ai.

“Ndai Munghpawm Nhtoi hpe anhte amyu sha laknak hpai uhpung uhpawng ni mung ahkyak shatai nga ga ai. Ahkyak shatai ai majaw she daini wunli wungau hte hpring ai mungdaw nhtoi hta e anhte KIO a sat sa nga ai mungmasa lamyan ni hpe chye lu hkra shale ai masa re” nga KIO a tsun shaga ahkang lu ai Slg. Lah Nan kawn tsun ai.

Dai hte maren bum nga masha hte pa nga masha ni pawnghpawm lam hpe madung dat let gawgap da ai Panglung Ga Shaka kawn ningpawt hpang wa ai (68) lang ngu na Munghpawm Nhtoi pyi du sai rai nga ai. Amyu sha bawsang ni shada da kam hpa hkat nhtawm prat tup lata gindun let munghpawm kata sim sim sa sa hte nga pra sa wa na lam ngu ai Panglung myit jasat hpe ningpawt nhtawm mungdan asuya hte amyu sha laknak hpai rawt malan hpung ni shakut nga ai simsa lam bawngban ai lam ni, awngdang hkra lahkam wa lu na re ngu lashum lanoi kam hpa ai lam shaleng da ai.

KIO gaw Gumsan Magam Slg. Ting Tsing a munghpawm nhtoi de shaw shaga ai lam hpe lu la sai raitim simsa lam myit hkrum lata masat jawm htu ga ngu ai numshawn hpe myit n hkrum ya ai majaw n sa du mat ai re nga Slg. Lah Nan tsun ai.

“Anhte KIO uhpung uphpawng hku na gaw NCCT hku nna sat sa nga ai mungdan ting madang gap hkat jahkring lam hte seng ai bawngban hpawng hta lai nna laga simsa lam hpe n htan shai wa shangun ai lam-yan ni hta hkawm na jasat n nga ai” nga shi kawn tsun ai.

Dai hpang Ne Pyi Daw kaw du taw nga ai amyu sha laknak hpai uhpung uhpawng ni hte Myen asuya ni simsa lam jawm gawgap ai lam gaw, ya yang na NCCT sat sa nga ai mungdan ting gap hkat jahkring bawngban ai lam hpe hten run shangun mai ai majaw tsang nga ai.

Munghpawm Nhtoi lamang hta lung ai uhpung uhpawng ni gaw munghpawm nhtoi e simsa lam hte gap hkat jahkring lam hpe matut nna galaw sa mat na ngu ai ga shaka ntsa lata masat jawm htu mat wa na re lam chye lu ai.

Asuya gaw amyu sha bawsang uhpung (16) hpe saw shaga da ai raitim KIA hte hpawn Karenni Amyu Sha Rawt Jat Pati (KNPP) hte Ta-ang (Balawng) Amyu Sha Rawt Malan Hpyen Dap (TNLA) uhpung (3) n sa du ai lam re.

1947 ning February 12 ya shani Panglung ga sadi hpe Awng San wa hte hpawn Jinghpaw, Sam, Hkang amyu sha ni rap-ra ai amyu sha ahkaw ahkang lu na matu lakmat jawm htu ai rai nga ai.

Posted in: SHIGA