Shinggyim ahkaw ahkang tawt lai lam sawk shapraw ai ni hpe jahkrit shama nga

Jan 22 ya shani Myitkyina kaw ramma ni ninghkap n-gun madun nga yang

Myen shi htawn ni hte shinggyim ahkaw ahkang a matu makawp maga tsun nga ai ni hpe tara jawat ai lam hte jahkrit shama ai lam ni jahkring na matu Fortify Rights shinggyim ahkaw ahkang uhpung kawn January praw 3 ya shani ndau laika shapraw dat ai.

Lai wa sai January 20 ya shani Sam Mung Muse ginwang Nam Tau mare Kawng Hka kahtawng na Jinghpaw Wunpawng Hkalup Hpung Ginjaw (KBC) kawn laika hpaji sasana apnawng saranum Maran Lu Ra hte Tangbau Hkawn Nan Tsin yan hpe roirip nna sat hkrum ai manghkang ntsa sawk sagawn nga ai ni hpe dingbai dingna jaw jahkrit shama mat ai nga tsun ai.

“Hkrit ra na zawn re ai sat lawat hpe anhte mu mada taw ai. Mungmasha ntsa majan ladaw ten tawt lai shut shai ai zingri zingrat lam ni gaw dingyang naw byin nga nna myen hpyen dap gaw tara jeyang ai ladat hpe dinglun ai lam ngap mat hkra galaw nga ai masing langai zawn grau grau hkrang shala wa ai” nga Fortify Rights hpung a Matsun Du Mr. Matthew Smith kawn tsun ai.

Dai amyu shayi yan matsan mayan rai si mat ai lam hte seng nna Myen hpyen dap a sat lawat gaw ningpawt ninghpang ahkaw ahkang hpe pat hkrum ai masa re nga Mr. Matthew Smith tsun ai.

“Daru magam manat ai ni gaw shanhte a shinggyim ahkaw ahkang hpe makawp maga ya ai baw she re. Grau grau hkrit wa hkra snr mara tawt lai ai ni jeyang n hkrum ai hkrang danhkung wa hkra galaw ai baw n re”

Myen Mung kata manghkang byin ai shara ni hta Shinggyim ahkaw ahkang tawt lai ai lam hte seng nna tawt lai ai ni hpe sawk shapraw jeyang na malai mabyin teng sawk shapraw ai ni hpe mahtang jahkring shama wa nga ai majaw hkrit tsang hpa masa byin wa ai lam tsun shaleng da ai.

Myen Mung hta laknak hpai manghkang ni lapran shinggyim ahkaw ahkang hte shinggyim nauna tsawra matsan dum lam hte seng ai tara ni hpe tawt lai nhtawm mara kaba ni tawt lai nga ma ai ngu jawat hkrum ai uhpung ni yawng a tawt lai shut shai ai lam ni hte seng nna, wanglu wanglang re ai mungdan gadaga jep sagawn hpung langai hpaw ya na matu mung Fortify Rights kawn hpyi shawn dat ai.

Kawng Hka mare masha ni hte shinggyim ahkaw ahkang uhpung uhpawng ni hku nna Myen asuya hpyen dap Hk.M.Y Masat (503) dapdung ni kawn roirip nhtawm sat kau ai lam re nga tsun tawn ai.

January 28 ya shani Myen asuya shi laika ni hta seng ang ai kawn jep sagawn ai lam galaw nga ten hpyen dap ntsa jahpoi ahkyak jawat tsun ai lam ni galaw wa ai lam ni mu lu ai majaw mabyin teng paw pru wa ten hpyen dap ntsa n teng n man tsun ai lam hte seng nna tara masan hte hkrak matut hkrang shapraw mat na re lam tsun tawn ai.

Dai hpang Jinghpaw Mungdaw Hpakan ginwsang Maw Wan mare lawk (1) Sut Ngai Yang kahtawng kawn tsang (9) jawngnum Shy. Ja Seng Ing asak (14) ning si ai manghkang hta mung tang shawn ai wa; kawa Slg. Brang Shawng hpe hpyen dap kawn tara nhtang jawat ai lam gaw asuya hta lit nga ai ngu Fortify Rights kawn kapyawn shaleng da ai. Asak (45) ning Slg. Brang Shawng ntsa hpyen dap kawn tara nhtang jawat da ai lam hpe dawm kau na matu Fortify Rights kawn lai wa sai December (18) ya shani hpyi shawn dat ya masai rai malu ai.

Posted in: SHIGA