Lahta Sam mung Munggu ginwang daw kata na Myen asuya dap ni hte Wunpawng Mungdan Shanglawt Hpyen Dap (KIA) hte hpawn dap hpawm lapran majan byin ai majaw mare masha 700 hkawt hprawng yen hkawm nga ai lam Mungmau Ginwang Jinghpaw Wunpawng Hkalup Hpung a tsin-yam masha lakawn lanawn hpung kawn lit nga ai wa Sara Sumlut Brang San tsun ai.
Sak Hkung Hka a sinna hkran Munggu ginwang daw Hpawng Seng ginra makau daphpawm hpyen hpung ni hte Myen asuya dap ni a majan nhpan a majaw Hpawng Seng grup-yin nga kahtawng 8 daram kawn mare masha ni February 20 ya shani kaw nna Miwa-Myen ga jarit Hka Lum Hkyet hta shingbyi nga nna malu masha yak hkak jamjau nga ai lam shi kawn tsun ai.
“Hpawng Seng Bum marawn mayan e kahtawng 8 hkawt nga ai. Dai kahtawng masha 700 ram gaw mani kawn hpawng taw ai re. Anhte sa shaga na matu shanhte hpe matut mahkai yu yang lam lapran gap hkat taw ai majaw sa shaga na yak taw ai. Ya yang nga na shara hte malu masha ni n nga ai majaw jamjau hkrum taw nga ai” nga matut tsun ai.
Dai hpyen yen tsin-yam masha ni gaw Miwa hkran de shingbyi nga na matu Miwa asuya kawn n hkap la ai majaw Miwa-Myen ga jarit Hka Lum Hkyet shara e shingbyi nga ai re nga shi kawn tsun ai.
“Dai maga shani shagu ngu na majan byin nga ai. Mare kahtawng 7, 8 hkan n mai nga mat sai. Shanhte gaw Ku Kang maga majan byin ai majaw Miwa ni Sak Hkung Hka lai di nna ndai hkran rap wa yang Myen asuya dap kawn gap na re nga hkap taw nga ma ai. Dai kaw amyu sha bawsang dap hpawm ni hte wa katut ai majaw majan byin ai” nga shi kawn matut tsun ai.
Lahta Sam mung KIA Dapba 4 ginra Munggu ginwang daw kata shani shagu ngu na majan kateng kapang byin nga ai raitim ginra buga masha ni hprawng yen hkawm nga ai lam hte seng nna laga mi n chye lu shi ai lam KIA Ba 4 kawn salang langai tsun ai.
Ta Hkaw Hka sinpraw hkan Lau Kai ginra maga hta Myen Amyu Sha Demokaretik Dap Hkawm (MNDAA) hte majan byin nga dingyang rai nna February 21 ya shani hkying 11:00 kawn Hpung Shwi Shan hta mung Myen asuya n-bung dap kawn jet n-bungli 2 hte bawm jahkrat gap gasat mat ai nga MNDAA a tsun shaga ahkang lu ai wa Slg. Htun Myat Lin kawn tsun ai.
February praw 9 ya shani kaw nna Lahta Sam Mung Ku Kang madu uphkang ginra Lau Kai ginwang hta MNDAA hte hpawn Ta-ang Hpyen Dap (TNLA) hte Rahkai Hpyen Dap (AA) ni pawng ai dap hte gasat gala ai majan a majaw Miwa ga de hpyen yen tsin-yam masha 30,000 jan gaw hprawng yen shingbyi taw sai lam chye lu ai.
0 comments:
Post a Comment