J.W pati masum amu arau galaw sa wa na, magam dap 5 hpaw

Dr. Dau Hkam (pai), Slg. Gumgrawng Awng Hkam (ga ang), Dr.Manam Tu Ja (hka)

Jinghpaw mung masa pati masum shanglawm ai, Jinghpaw Mungmasa Mahkri Shawn Zinlum Komiti, KPCC gaw arau jawm ta tut bungli galaw sa wa ai kaw ahkyak ai magam dap 5 hpe hpaw shabawn dat sai re.

July praw 9 bat Kru Ya shani, Myitkyina mare Anglican Nawku Jawng Wang gawknu e galaw ai pati masum hkrum ra zuphpawng e ndai magam dap ni hpe hpaw dat ai re lam, KPCC a Shi Htawn lithkam Slg. Lum Zawng ya na zawn tsun ai.

“Dai ni gaw KPCC a magam dap (5) mung shawa mahkri shawn dap, Ja gumhpraw dap, Kachin bawsang myu lakung dap, Kachin state constitution drafing, shawa matut mahkai dap ni hpe hpaw la nna lit hkam ni yawng hpe shatsam lu sai.”

Matut nna, pati pawng hpawm lam hta n shang lawm shi ai Jinghpaw Wunpawng Amyusha Democracy Rapdaw Pati (KNC/KNCD) hte Lisu Amyusha Rawt Jat Pati (LNDP), yan a ningbaw ni hte mung tinang amyusha shawnglam a matu bawngban jahkrup mat na re lam, Slg. Lum Zawng tsun shalawm wa sai.

Ya KPCC kata hpaw dat ai magam dap ni hpe Jinghpaw Mungdaw Democracy Pati (KSDP) ningbaw Dr. Manam Tu Ja, Jinghpaw Wunpawng Democratic Pati (KDP) ningbaw Slg. Gumgrawng Awng Hkam hte Lawngwaw Myusha Zinlum lam hte Rawt Jat Pati (LNUDP) ningbaw Dr. Dau Hkam ni hku nna, bat Kru Ya shani ta masat hte hkap la shagrin dat sai re.

Posted in: