Myen-KIA Hpakan lungseng maw e majan laja lana byin

Myen-KIA Hpakan lungseng maw e majan laja lana byin

Myen asuya dap hte Wunpawng Mungdan Shanglawt Hpyendap, KIA Masat 6 Dapdung hpyen hpung lapran, Hpakan lungseng maw e July 14, mani lani mi hta sha, lahkawng lang laja lana gasat gala majan byin wa sai re.

Hpakan mare grup yin Ja Ra Yang lahta Ga Ra Yang maga de hpyen masa shang shamu shamawt wa ai, Myen hpyendap Sinpraw Daw Daju, Y.P.Hk npu Hk.L.Y 102, Hk.M.Y 336 hte Hk.M.Y 427 pawng hpawm hpyen hpung hte KIA lapran, majan byin ai lam re.

Ndai lam hte seng nna, Jinghpaw Shiga Dap KNG kawn, ginjaw Laiza na KIO Shiga Htawn Shana Dap lit nga Du kaba Nhpang Naw Bu hpe san yu ai shaloi,“Myen ni lung wa ai kaw gan hkrum let gap hkat ai nga na ai, raitim anhte kaw na bai n gap htang ai re majaw bai zim mat ai da” nga nna, tsun wa sai re.

Hpyen hpung lahkawng lapran, hkying 1:50 pm dagram kaw nna hkying 3:40 pm daram du hkra kalang hte shana de hkying 6 pm kaw nna hkying 8 pm jan du hkra kalang, laja lana gap hkat wa ai re.

Shana gap hkat hkring nna Myen hpyen ni thing nut mat ai hpang, hpyen mang (8) mu ai hta, du jum 2, gyi jum 1, gyi 1, lat gyi 1 hte hpyen ma 3, re lam KIA Dap (6) shawnglam shiga ni hta tang madun ai.

July 13, bat Masum Ya jahpawt daw hta mung, Myen hpyen Hk.M.Y 325 hte 326 pawng hpawm dap gaw Ja Ra Yang kahtawng makau Pawt Bum lagaw de lung wa ai shaloi, KIA ginra makawp maga bawm kabye kapaw la nna shanglawt ni nga ai shara de RPG hte 5 lang hte 60 mm mortar 2 lang, matai htang gap ai lam galaw wa sai re.

Myen gumsan magam Slg. Htin Kyaw asuya woi galaw ai du na August shata ‘Munghpawm Simsa Lam Hkrum Ra Zuphpawng- Tsaban 21 Panglong’ n hpang shi yang, rudi amyusha rawt malan hpung ahkum ara shawnglawm ai zuphpawng kaba hpe KIO Sinpraw Ginwang Ginjaw, Mai Ja Yang mare hta ndai shata htum wa de galaw na hkyen nga sai re.

Ndai ten, tatmadaw Myen hpyendap gaw, KIO a shang gumhpraw hte sut masa dan di ai ‘majan masing’ hpe Hpakan lungseng maw, pat maw-ja maw sawng ai Hugawng Pa hte Miwa ga jarit hpun hpaga chyai ai Manje myone ni hta galaw nga ai re. Dai re majaw, ndai ginra masum hta galoi aten n tam majan byin wa mai ai lam, KIO ginjaw salang ni tsun nga ai re.

Posted in: