Tuesday, September 23, 2014

Gap jahkring na gabaw hpe NCCT hte asuya bawng jahkrup n lu shi

Slg. Nai Han Ta, NCCT ningbaw

Mungdan ting madang gap hkat jahkring ga sadi nhprang a matu asuya Munghpawm Simsa Lam Hkrang Shapraw Komiti (UPWC) hte Mungdan Ting Madang Gap Hkat Jahkring Bawngban Jahkruup Hpung (NCCT) lapran 6 lang ngu na bawngban hpawng hta lahkawng ya du hkra atsawm n lu jahkrup shi ai nga NCCT Ningtau Ningbaw Badu Koi Htu Win tsun ai.

Lahkawng maga bawngban ai lam hpe Myanmar Peace Center (MPC) ginjaw kaw September 22 ya shani kawn galaw hpang ai rai nna September 23, lahkawng ya ngu na shani na zuphpawng hpe shawoi na hku nga yang shana daw 5:00 pm hta shangut na matu masat da ai raitim dap hte seng nna bawngban ai lam hta jahkrup n lu ai majaw shana daw hkying 3 jan hta zuphpawng hpe ginchyum dat kau ai rai nga ai.

“Daini bawngban ai hta nkau daw ni hkan gaw anhte hpang de she bai jahkrup ga ngu ai hta, maga mi hku na ntsa tsang na seng ang ai hpuawn ni hpe naw tang madun ra ai daw ni mung nga ai. Myit n hkrum ai ngu na hta rai naw n lu jahkrup ai daw ni nga taw ai le i” nga Badu Koi Htu Win tsun ai.

“N mai byin mat ai gaw n re. Myit hkrum ai lam rai n nga ai lam ni hpe maga mi de anhte a dap shara jahkrat ai lam ni, gap hkat jahkring na lam hte seng ai daw ni hpe anhte bungli hpung hpe bai jahkrup na matu myit hkrum da ai” nga matut tsun ai.

Lai wa sai August shata 5 lang ngu na bawngban hpawng hta ndai bawngban lam n du shi yang dap shara jahkrat na lam, gap hkat jahkring tarawng tara (code of conduct), lahkawng maga ginrun yu reng komiti (Joint Monitoring Committee) hpaw ninghtan nhtawm bawngban jahkrup na myit hkrum da ma ai. Raitim n lu jahkrup ai majaw ya daini September 23 ya shani hta kahtap nna dawdan ai nga Badu Koi Htu Win tsun ai.

Anhte kalang bai n hkrum shi yang bungli hpung ni hpaw nna jahkrup nna she ka na matu myit hkrum dai ga ai. Raitim ndai hpat wat ladaw hta n lu jahkrup dat ai. Daini na bawngban hpawng hta kahtap shagrin nna anhte ndai zuphpawng ngut yang nhtoi masat nna bungli hpung ni kalang bai bawngban na dawdan da ai” nga matut tsun ai.

Lahkawng ya ngu na bawngban hpawng hta gap hkat jahkring hkrang nhprang daw; 1- 4 du hkra bawngban ngut sai rai nga ai. Daw; 5 mung masa bawngban ai lam hta hkam dahka nga ra ai ngu ai gabaw hpe daini jahkrup hpang nga sai lam, daw; 6 hte daw; 7 hpe mung matut bawngban na matu naw ngam nga ai nga Badu Koi Htu Win tsun ai.

September 22 shawng ningnan bawngban ai shani hta Federal Munghpawm gawgap lam hte seng nna hpyen dap maga na ni hte shuk hkat ai lam nga nna lahkawng ya ngu na bawngban hpawng hta dap shara jahkrat na lam hte seng nna bawngban ai lam mung n lu jahkrup nna bawngban hpawg hpe jau jau jahkring kau ai nga chye lu ai.

Mungdan ting gap hkat jahkring hkrang nhprang hta lahkawng maga naw jahkrup ra ai daw ni gaw hpat wat ladaw hta dap shara jahkrat lam, mung masa bawngban hpawng hta shanglawm na uphpung uphpawng ni, gap hkat jahkring sen htu na ni hpe masat mat na lam ni rai nga ai.

Dai hpang 5 lang ngu na bawngban hpawng hta asuya maga kawn hkapla da ai Federal daphpawm gawgap na lam ngu ai ga si ni bawngban ai lam hta hpyen dap maga shuk taw nga ai majaw matut jahkrup ra ai lam rai nga ai.

Shawng ningnan shani na bawngban hpawng hta hpyen dap, dap awn daju wa jahkrat da ai prat-shang simsa lam la na matu myit hkrum ga sadi hte maren sadi dung na lam, Simsa lam myit hkrum da ai lam ntsa akyu n tam na lam, tara ni hpe tup hkra hkan sa na lam, du-ta-wun aye tung-pa hte Democracy lai hpe hkamla nna 2008 hpaw shabawn hkrang gaw da ai tara hte Democracy de lahkam wa ai hta hkan nang hkansa ra na ngu ai lawng lam ni hpe shajin mat wa na n re nga Dukaba Myin Tsu kahtap tsun ai re.

Mungdan ting gap hkat jahkring bawngban ai lam hpe du na September 26 ya shani galaw na rai nga ai.


0 comments:

Post a Comment