Hugawng Pa hta Yuzana company nga taw ai hpe ginra masha ni n ra

Yuzana company sun hta lang ai shingja tsi a majaw si daw ai wudoi langai

Jinghpaw mungdaw Mungnyang (Mu Nyin) ginwang, Hpakan myu-ne Hugawng Pa ginra kata ‘Yuzana Company nga nga ai hpe ra/n ra shawa myit ra hkamla ai lamang’ hpe September 22 ya shani buga masha ni galaw ai hta n ra sharawng ai me grau law ai nga dai lamang hte seng nna tsun shaga ahkang lu ai Sara. Awng Lat kawn tsun ai.

Hpakan myu-ne Wara Zup mare kaw lawm ai Bankawk, Tsan Pya hte Awng Ra ndai kahtawng mali kawn mare masha ni Wara Zup mare na Jinghpaw Wunpawng Hkalup Hpung nawku jawng gawknu kaw lamang galaw ai hta buga masha yi sun hkauna galaw ai ni marai 755 kaw na company hpe n ra sharawng maga madi shadaw ai me 726, ninghkap me 19 hte shaprai me 10 hpe lu la ai nga tsun ai.

“Yuzana company shang bang wa ai kawn daini du hkra anhte mare masha ni a matu kaja lam hpa n hkam sha lu ai. Daini du hkra anhte yak hkak amyu myu hkrum nga ra ai. Mare masha ni Yuzana company hpe ra ai i, n ra ai i ngu hpe chye mayu ai majaw galaw ai re” nga Sr. Awng Lat tsun ai.

Dai company gaw mung shawa a matu hpa akyu n hkam sha ai hta sha n ga hkra machyi shangun ai lam ni hpe sawk sagawn lu na matu Pa Ningbaw Komiti hpe mare buga na yi sun hkauna galaw masha marai 15 hte lai wa sai September 14 ya shani hpaw ninghtan dat ai nga chye lu ai.

2006 ning October shata kawn Yuzana company gaw yi sun hkauna masha ni a shara ni zing ai lam, yi sun ni jahten hkrum ai lam, wudat shara ni zing la kau ai lam ni a majaw Dusat Yam Nga ni n nga mat wa sai nga Sr. Awng Lat matut tsun ai.

“Moi gaw anhte kahtawng hta dumsu, wuloi 1,100 jan nga ai. Ya gaw 200 ram sha nga sai. Dumsu, wuloi ni n nga jang gaw hkauna galau mung n mai sai. Shanhte company na maza ntsin ni mung hkashi hkan lwi shang ai. Dai ntsin ni gaw hkashi hkan shang nna nga ni si jawng ai” nga tsun ai.

Yuzana company a jak-rung kawn maza ntsin ni gaw Nam San hka shi de lwi bang ai majaw nga ni si ai lam daining laman lahkawng lang byin nna dai hka shi lawu de mare masha ni lu lang ai hta kan ana ni byin lai wa sai nga matut tsun ai.

Daini na me bang hpawng a mahtai ni hpe Jinghpaw Mungdaw Hkringmang Daju Slg. Lajawn Ngan Seng hpang de tang madun sa wa na rai nna Yuzana company le mat wa na matu shawa ra sharawng ai hte maren matut shakut shaja mat na re lam Sr. Awng Lat kawn tsun ai.

Dai hkauna masha ni hte Yuzana company lapran yi sun manghkang ni jep joi na matu Jinghpaw Mungdaw rapdaw hta komiti langai hpaw shabawn na lam Hpakan myu-ne rapdaw dat kasa Slg. Nhprawng Gam kawn tang shawn ai lam hpe lai wa sai April praw 9 ya shani shagrin ya sai rai nga ai.

Yuzana company gaw moi na asuya ahkang hte Danai Hugawng Pa ginra kata lamu ga eka sen 2 jan zing la nhtawm dai hkan hkai da ai namsi namsaw sun ni, hkauna shara ni hte hkaibawng hkaiban ni hpe jahten ya ai majaw, sum machyi shabrai lu na matu yi sun hkauna masha ni rung shawk da ai rai tim, Yuzana company n jaw ai. Ya du hkra hparan ya ai lam mung n nga ai.

2006-2007 ning laman Hpakan myu-ne Wara Zup mare kaw lawm ai Wara Zup, Shahtu Zup, Bankawk, Awng Ra, Nam San hte hpawn kahtawng 5 kawn yi sun, hkauna, maling mala ni hpe Yuzana company kawn zing ai hta nkau dum nta ni htawt sit hkrum ai rai nga ai.

Zing da ai lamu ga eka 1,000 jan a matu ru-hka hte machyi hkam manu ni bai lu la hkra hkauna masha 60 jan gaw Yuzana company hpe rung shawk da ai hta Yuzana company maga kawn hkauna eka 1 hta mun 8, yi sun eka 1 hta mun 6, maling mala sun eka 1 hta mun 3 hte nta langai hta kyat sen mi shadang hte Jinghpaw Mungdaw tara rung kawn ru-hka jaw na matu 2011 ning January shata laman amying jahkrat dat sai rai nga ai.

Dai ru hka a hpe yisun hkauna masha ni myit n dik ai majaw 2012 ning August shata e yi sun hkauna masha ni Yanggung myu nga Yuzana company rung shawng hta n-gun madun ai hta company madu Slg. Hte Myit gaw zing da ai lamu ga eka sen 2 jan kawn eka mun 5 hpe n htang ap ya na nga tsun wa ai raitim, yi sun hkauna ni bai jaw ai lam n nga shi ai lam buga masha ni tsun ai.

Dai hpang 7 ning na zing madu da ai yi sun ni bai lu la hkra lai wa sai May shata hta kahtawng masha ni Yangung ga de yu wa nhtawm n-gun madun ai lam matut galaw sai rai nga ai.

2006 ning kawn Yuzana company gaw moi na asuya a ahkaw ahkang hte lamu ga shara majen je lu hkra Hugawng Pa ginra hta eka sen 2 jan maden la ai rai nga ai.

Posted in: SHIGA