NCCT zuphpawng hta dap shara jahkrat na lam hte shawnglam jasat jasa ni masat jahkrat

Amyu sha rawt malan hpung ni shiga dap sanglang hpawng galaw nga yang

Mungdan ting madang gap hkat jahkring lam hte seng ai bawngban jahkrup hpung (NCCT) gaw munghpawm simsa lam hkrang shapraw komiti (UPWC) hte hkrum shaga na matu dap shara jahkrat na lam hte rau shawnglam magam bungli jasat jasa ni hpe masat jahkrat ai nga NCCT a Ningtau Ningbaw Badu Koi Htu Win kawn tsun ai.

“Shawnglam jasat jasa ngu ai hta matut bawngban ra ai daw ni mung lawm ai. Shawnglam jasat jasa ngu ai gaw hpang jahtum bawngban hpawng kawn dawdan nna matut galaw ra na masa ni rai nga ai. Ngu mayu ai gaw dap shara jahkrat na lam, ndai kaw gaw matut hkrang shapraw ra ai ginrun bungli hpung ni hpaw nhtawm matut bawngban nna tang madun na rai nga ai. Anhte maga chyawm hkyen lajang da ai lam ni nga ai” nga Badu Koi Htu Win tsun ai.

NCCT a zuphpawng hta mungdan ting madang gap hkat jahkring lam hte seng ai myit hkrum lam hkrang nhprang 3 ntsa sawn maram yu nna, dap hte seng ai lam ni hpe bawngban na matu, ginrun yu reng komiti (Joint Monitoring Committee) hte arawn alai tara (Code Of Conduct) hpe bawngban sa wa na matu bungli komiti langai hpaw shabawn dat ai nga NCCT hpung shang Dr. Salai Lyan Mung kawn Shihtawn ni hpe tsun ai.

Dap hte seng ai, ginrun yu reng komiti hte arawn alai tarawng tara ni bawngban na matu komiti ningbaw hku na Wunpawng Mungdan Shanglawt Hpung (KIO) Tau Dap Awn Daju Sumlut Gun Maw hpe lit shatsam ya ai.

Arawn alai tarawng tara hpe woi awn bawngban na matu Democracy Akyu Jaw Kayin Hpyen Dap (DKBA) kawn Ninggawn Amu Madu Dukaba Taw Lung Lung, ginrun yu reng komiti hpe woi awn komiti hku nna Kayin Amyu Sha Uhpung Uhpawng (KNU) kawn Ginjaw Komiti malawm Tsaw Ta Du Mu hpe lit jaw bungli shatsam ai lam rai nga ai.

Mungmasa hkrum shaga bawngban na masa hte seng ai hkrang ka lajang na bungli komiti ningbaw gaw KNU a Ninggawn Amu Madu Badu Koi Htu Win hpe lit jaw shatsam da let, Pa-u Amyu Sha Rawt Malan Hpung (PNLO) kawn Dukaba Hkun Uk Ka hte Hkang Amyu Sha Hpyen Dap (CNF) kawn Dr. Salai Sahkawng ni hpe malawm hku nna lit jaw shatsam da ai nga matut tsun ai.

Dai hpang UPWC hte NCCT ni mungdan ting gap hkat jahkring hkrang nhprang 3 hpe bawngban sa wa na matu asuya maga kawn galaw shagrin da ai ninghtoi 22, 23, 24 ya shani hte hpawn maga ya bawngban na matu NCCT kawn dawdan da sai lam chye lu ai.

Ya yang, NCCT hte asuya bawngban na hta woi awn komiti hpaw shabawn na lam, lapran ladaw na masing hte mungmasa bawngban ai lam hpe masum brum bawngban hpawng galaw na lam ngu ai lawnglam 3 hpe matut bawngban na ra rawng nga ai lam Dr. Salai Lyan Mung tsun ai.

“Anhte gaw woi awn komiti hta asuya maga na Gumsan Magam madang daw lawm ai UPCC mung lawm ging ai ngu galaw shagrin da ga ai. Shanhte gaw dai woi awn komiti hpaw na matu n ra sharawng ai masa nga ai nga yang gumsan magam hte anhte hpe maren mara n kam da ai.  Maren mara ahkaw ahkang hpe n hkapla ai masa byin taw nga ai. Dai hpe manu mana naw bawngban na ra ai” nga matut tsun ai.

Mungdan ting gap hkat jahkring lam hte mungmasa bawngban hpawng ni hta woi awn komiti langai n nga ai sha bungli komiti madang hte sha galaw sa wa nhtawm manghkang lama ma byin wa yang, hparan ya mai ai ginrun woi awn komiti ra gadawn ai nga matut tsun wa ai.

Dai hpang NCCT maga kawn munghpawm simsa lam hte seng ai ginrun woi awn komiti hpaw na matu tang madun ai lam hpe asuya gaw munghpawm simsa lam bawngban lam hte seng ai komiti ngu nna gan myit hkrum da ai lam chye lu ai.

NCCT gaw asuya gawng malai tai ai hpyen dap, asuya hpung, rapdaw ni lawm ai dat kasa, amyu sha laknak hpai rawt malan hpung kawn dat kasa hte mungmasa pati kawn dat kasa ni shanglawm na lam hte dai ni shanglawm ai masum-brum bawngban na matu galaw shagrin da ai lam rai nga ai.

Asuya maga na amyu sha laknak hpai rawt malan hpung ni hpyi shawn ai daw-shan ni hpe hkap la na rai yang daining laman mungdan ting madang gap hkat jahkring lakmat htu lu na re nga matut tsun ai.

NCCT a tauhkrau bawngban hpawng hpe Htai Mungdan ga jarit shara mi hta September praw 9 ya shani kawn hpawng hpang nga ai rai nna September 12 ya shani NCCT bungli hpung bawngban hpawng hpe ginchyum dat na re lam chye lu ai.

Posted in: SHIGA