Thursday, September 4, 2014

UNFC hkrumra hpawng kawn magam lit nnan bai lata san bungli shatsam

Du Daju Jum Nban La, UNFC ningbaw hte KIO ningbaw malai

Myen Mung, Amyu Sha Hpyen Masa Mungmasa Dap Hpawm UNFC ningbaw hku nna Wunpawng Mungdan Shanglawt Hpung (KIO) kawn Du Daju Jum Nban La hpe bai shatsam nhtawm ningtau ningbaw (2) shara kaw Karen Amyu Sha Uhpung Uhpawng (KNU) hpe lata san shagrin dat ai.

Htai mungdan Chiang Mai mare hta galaw ai nambat langai lang na UNFC hkrumra hpawng hpe 7 ya na galaw ngut ai hpang September praw 2 ya shani marai 12 shanglawm ai komiti nnan hpe shim ai me bang ladat hte lata san dat ai rai malu ai.

Du na 2014-2016 ning, lahkawng ning ladaw a matu UNFC ningbaw KIO Dkb. Nban La, ningtau ningbaw (1) Slg. Nai Han Ta, ningtau ningbaw (2) KNU, amu madu Slg. Hku U Ye, shingtau amu madu (1) Dkb. Hkun Auk Ka, shingtau amu madu (2) Salai-htala He, Doctor. La Ja (KIO), Dkb. Bi Htu, Duwa. Bawmwang La Raw, Dkb. Tsai Htu, Doctor. Hkin Mawng hte KNU ni hpe ginjaw komiti malawm hku nna lit jaw da ai.

Lai wa sai 3 ning ladaw hta UNFC a ningbaw gaw KIO Ningbaw Malai, Latdu Daju Jum Nban La rai nna Ningtau Ningbaw gaw KNPP Ningbaw Kaba Aebe Tut hte Amu Madu gaw Slg Nai Han Ta ni lit la sa wa ai rai malu ai.

UNFC dap hpawm de bai hkyawm wa na re ngu myit mada da nhtawm hkring hkra le mat ai KNU hpe Ningtau Ningbaw (2) shara hte ginjaw komiti malawm hku nna shara jaw da ai re nga UNFC a Ningtau Ningbaw (1) Slg Nai Han Ta kawn tsun ai.

“Shanhte a sat lawan hpe maram lu ai daram nga yang lai wa sai 15 lang ngu na rapdaw kaw rawt malan hpung ni yawng myit hkrum mangrum hte shang tsap yang sha badang ninglaw hte ni kahtep wa na re ngu ai jasan jasa nga malu ai. Dai jasan jasa lam hku nga yang ginjaw komiti zuphpawng dung nhtawm anhte UNFC hte bai chyawm wa na nhten ngu maram lu ai. Dai majaw anhte ni san da ai lam re” nga tsun ai.

Dai hte maren KNU hku na hkrumra hpawng de jaw ai laika a ntsa UNFC hku na tara shang laika bai htang na rai nna dap hpawm de bai hkyawm wa lu na hpe myit mada ai lam UNFC a Ningtau Amu Madu Slg. Hku U Ye kawn September praw 3 ya shani galaw ai Shiga sanglang hpawng hta tsun ai.

“Shanhte ginjaw komiti zuphpawng galaw ngut ai hpang UNFC daphpawm de kalang bai hkyawm wa na hpe anhte galoi mung hkap tau la ga ai. Dai hku sha galaw na re ngu myit mada da ai lam hpe dawdan da ai lam nga ai” nga matut tsun ai.

KNU hpe Ningtau Ningbaw shara san da ai a ntsa rai n chye lu ai raitim UNFC hta bai shang n shang hpe gaw ginjaw komiti zuphpawng ngut yang dawdan mat na re lam KNU Amu Madu Badu Koi Htu Win kawn tsun ai.

“Anhte ni ginjaw komiti zuphpawng galaw nhtawm matut nna shang lawm n shang lawm gaw anhte dat kasa naw dat ra na re. Anhte ni Ningbaw shara kalang dat lata san nna sa dat ra ai masa kun n chye ai. Anhte gaw woi awn ai daw hpe ra na n re. Hpung malawm hku na mung jawm galaw mai ai she rai yang” nga tsun ai.

KNU kawn daphpawm hpaw shabawn hkrang hpe hkrumra hpawng de tang ai lam a ntsa masa shai hkat ai lam ni nga majaw August 31 ya shani UNFC hte hkrumra hpawng kawn wa lang gale mat nhtawm September praw 1 ya hta UNFC hpung na hkring hkra jahkring mat nna KNU dat kasa ni n sa sai lam KNU Ningbaw Kaba hte Ningtau Ningbaw ni kawn UNFC hpe tara shang laika shagun dat ai rai nga ai.

Lai wa sai August 25 ya kawn September praw 2 ya du hkra sanit ya tup galaw ai hkrumra hpawng hta dat kasa marai 90 sa du bawngban lawm ma ai.

August 29 hte 30 ya, lahkawng ya lapran mungdan kata na mungmasa democracy uhpung uhpawng ni hte hkrum shaga bawngban nna ya yang byin nga ai mungmasa lam-yan hta lata gindun let sa wa na lam dawdan da ma ai.

September praw 3 ya shani hta UNFC gaw Shiga sanglang hpawng galaw nhtawm Myen Mung Amyu Sha Demokresi Dap Hpawm Hpyendap (MNDAA) Kukang hpe UNFC a tara shang uhpung hku nna masat jahkrat dat ai hta sha n ga lawnglam 6 hpe mung masat jahkrat da ma ai.

UNFC hpe 2011 ning February shata hta hpaw hpang wa nna shawng na UNFC hkrumra zuphpawng hta, Wunpawng Mungdan Shanglawt Hpung (KIO), Karen Amyu Sha Uhpung Uhpawng (KNU), Hkang Amyu Sha Hpyen Dap (CNF), Karenni Amyu Sha Rawt Jat Pati (KNPP), Mun Mungdan Nnan Pati (MNSP), Sam Mung Rawt Jat Pati (SSPP/SSA), Pa-u Amyu Shalawt Hpung (PNLO), Lah Hu Democratic Uhpung Uhpawng (LDU), Balawng (Ta-awng) Amyu Shalawt Hpung (PSLF/TNLA), Wa Amyu Sha Uhpung Uhpawng (WNO) ni hte Myen Mung Amyu Sha Demokresi Dap Hpawm Hpyendap (MNDAA) Kukang hpung ni sa du ma ai.

Matut manoi ai uhpung ni rai nga ai Myen Mung Ting hte Seng Ai Jawng Ma Dap (ABSDF), Democracy Akyu Jaw Karenni Hpyen Dap (DKBA), Rahkai Mung Shalawt Pati (ALP), Rahkai Hpyen Dap (AA) hte Kayin Simsa Lam Kongsi (KNU-KNLA-PC) ni kawn dat kasa ni mung shang lawm ma ai.


0 comments:

Post a Comment