Munghpawm Simsa Lam Hkrang Shapraw Komiti (UPWC) hte Mungdan Ting Madang Gap Hkat Jahkring Bawngban Jahkrup Hpung NCCT ni ‘6 lang’ ngu na mungdan ting madang gap hkat jahkring hkrang nhprang hkrum shaga bawngban hpawng hta, hpang kalang bai kahtap bawng na lam hpe sha myit hkrum da ai lam lu la ai nga NCCT Ningbaw Slg. Nai Han Ta kawn tsun ai.
Mungdan ting madang gap hkat jahkring nhprang ntsa September 22 kawn 26 du hkra manga ya tup bawngban jahkrup ai hta, du na October shata laman kahtap hkrum na lam hpe sha myit hkrum ai lam lu la ai lam rai nga ai.
“Ndai hpawng hta mahtai atsawm hkrak re ai n lu ai ngu na daram re. Kaji kajaw re ai ni sha myit hkrum ai lam lu ai. Hpang na bat she matut bawng na ngu ai ram sha re. Tang madun ai kaw na myit n hkrum ai lam ni hpe bai dinglik yu na matu sha ginchyum dat kau dat ai” nga Nai Han Ta tsun ai.
Mungdan ting madang gap hkat jahkring lam myit hkrum lam lu la wa hkra dap hte seng ai lam ni hte hpat-wat ladaw tarawng tara ni, mung masa bawngban hpawng hta shanglawm ra ai hpaw shabawn hpung hte gap hkat jahkring lakmat htu ai hta sakse sakgan hku nna shanglawm lam ngu ai lawnglam ni matut bawngban na matu ngam nga ai lam matut tsun ai.
NCCT kawn tang madun ai lam hpe, asuya dat kasa ni dawdan ahkang n lu ai sha ntsa tsang de bai jahkrup na matu ra rawng ai lam ni nga ai majaw bawngban hpawng wa-hkye hkye mat wa nhtawm du na bawngban hpawng hta mung bawngban shakre lu na masa n nga ai nga matut sanglang dan ai.
“Munghpawm hpyendap hte seng nna shanhte chyawm.. n kam bawngban ma ai. Du na shata hta mung shakre la lu na masa n nga ai. Ningmu n bung ai majaw mung lawm ai. Law malawng gaw shanhte maga na dat kasa ni gaw n dawdan ya ai. Lahta de tang madun ra ai ngu baw sha law taw nga ai” nga matut tsun ai.
Amyu sha laknak hpai hpung ni tang madun ai gaw munghpawm hpyendap hpaw shabawn lam hpe asuya maga kawn shaprai jahkrat kau ya nhtawm mung masa bawngban ai lam hta masum brum shanglawm na lam amyu sha laknak hpai hpung ni tang madun wa timung, asuya maga gaw sanit-chyawm shanglawm na lam tang madun wa ai majaw kahtap bawngban na matu ra gadawn wa ai lam rai nga ai.
Dai hpawng, du na October shata hkrum shaga hpawng hta Mungkan Wunpawng Hpung hte Miwa Gumsan Mungdan kawn dat kasa ni shanglawm na matu saw shaga na lam hpe myit hkrum ai lam lu da ai nga matut tsun ai.
Maga mi hte maga mi lapran chye na hkat ai lam, makam lam ni hte myit hkrum ai lam ni grau nna lu la wa hkra lahkawng maga dat kasa ni hku nna mungdan ting gap hkat jahkring ga shaka lawan ladan galaw na lam hte mung masa bawngban hpawng hpe lawan ladan galaw let ten galu nganggrin ai simsa lam lu la wa hkra shakut shaja hkrang shapraw sa mat wa na re lam 5 ya bawngban hpawng ngut ai hpang na ginrun ndau hta shaleng da ai.
Mungdan ting gap hkat jahkring lakmat htu lu na matu jahkrup lu ai lam gaw mahtai langai rai nna lahkawng maga dat kasa ni kalang bai hkrum shaga bawngban lu na matu hkyen lajang ai zuphpawng hpe bat lahkawng laman e lahkawng maga galaw lu na zawn re nga MPC kawn Slg. La Mawng Shwi tsun ai.
“Ten garawt taw ai lam gaw maga mi hte maga mi tsap ai yaw shada lam ni nga ai gaw. Shanhte ningbaw ni shatsam na.. Law Hkyi La lamyan ni.. hpa ni nga ai zawn, Ndai maga mung lamyan ni nga ai majaw dai lamyan hta jan nna gaw jahkrup n mai shi ai. Dai majaw maga mi hte maga mi na ningbaw ni gaw masa lamyan hpe bai gram lu hkra gaw tang madun bawngban ra na re” nga matut tsun ai.
September 27 ya hta mung masa lamyan hkrang hte seng nna mung masa pati ni, UPWC hte NCCT ni Yangung mare Myanmar Peace Center (MPC) daju hta hkrum shaga bawngban na rai nga ai.
Mung masa pati yawng 67 hpe saw shaga da ai raitim pati 63 kawn dat kasa ni sha sa du ai re nga jahpan lu tawn ai lam Slg. La Mawng Shwi tsun ai.
0 comments:
Post a Comment