Wunpawng Mungdan Shanglawt Hpung (KIO) Dap Ba 4 npu na dap ni hte asuya Dapnu Masat 88 hpyen hpung ni Lahta Sam Mung Munggu ginra Mungbaw mare makau hta September 29 bat Masum Ya shani majan bai byin hpang wa ai nga Dap Ba 4 na salang langai tsun ai.
Shana hkying 9:00 kawn 10:00 du hkra KIO Dap Ba 4 npu Dap Dung 36 hte 38 ginra Mungbaw mung shawa hpyen hpung ni dap shara jahkrat da ai shara makau e asuya dap Dapnu 88 hpyen hpung ni hte gasat gala lam byin mat ai re nga matut tsun ai.
“36, 38 Mungbaw ginra kaw asuya hpyen hpung ni anhte ginra kata shamu shamawt nga ai na sai. Shanhte dingyang shamu shamawt nga ai kaw mani gaw majan bai byin wa ai re” nga tsun ai. KIO maga kawn si hkala ai lam n nga ai lam shi kawn tsun ai.
Daini September 30 ya shani mung Mungbaw mare makau grupyin hkan asuya hpyen hpung ni n-gun jat bang wa nhtawm Shanglawt hpyen dap ni hte grai ni kahtep wa ai majaw ten n tam majan bai mai byin ai lam dai Shanglawt salang wa kawn tsun ai.
Majan byin ai Mungbaw mare makau hta lahkawng maga na dap ni ep ep sha maja hkat nga nna masa lam shuk shanut nga ai nga matut tsun ai.
“Asuya Dapnu ni n-gun bai jat wa sai. Anhte hte grai kahtep wa sai. Lahkawng maga majen maja hkat nga ai. Majan gaw ten n tam mai byin ai” nga tsun ai. Asuya hpyen n-gun 1,000 grupyin gaw nga na re nga tsun ai.
KIO hte asuya ni lahkawng maga jawm hpaw shabawn da ai Manghkang Hparan Masit Hpung hpe hpaw shabawn ngut ai hpang lahkawng maga gasat gala shayawm na lam hte seng ai bawngban hpawng hta majan byin ai lam 95 tsa lam shadang du hkra yawm mat wa sai nga September praw 5 ya shani Simsa Lam Akyu Galaw Hpung kawn Slg. Lamai Gum Ja tsun wa sai rai nga ai.
Dai hpung hpaw shabawn da ai hpang daw, lahkawng maga gasat gala lam yawm mat ai zawn, September praw kawn mani shawng shani du hkra Dap Ba 4 ginra kata majan byin ai lam n nga ai hta September 29 ya shana kawn majan bai byin hpang wa ai re nga chye lu ai.
2013 October shata e Munghpawm Simsa Lam Hkrang Shapraw Komiti UPWC hte KIO ni hkrum shaga bawgban ai lam hta myit hkrum da ai hte maren, daining May shata praw 8 ya shani dai Manghkang Hparan Masit Komiti hpe Jinghpaw Mungdaw Lamu Ga Jarit Hkringmang Du Up Jum. Tan Awng woi awn ai dat kasa marai 5 hte KIO Ginjaw kawn Du Up Jum Maran Zau Tawng woi awn ai dat kasa marai 5 ni hte hpaw shabawn da ai rai nga ai.
0 comments:
Post a Comment