Friday, April 15, 2016

Chyum Laika hpe mungdaw laika buk masat na lam, veto hte pat

 
Slg. Bill Haslam, Tennesse Mungdaw Up

 

Amerika, Tennessee mungdaw e Hkristan Chyum Laika hpe Mungdaw Laika Buk masat na tara nhprang shagrin na lam hpe Mungdaw Up Slg. Bill Haslam gaw veto hte April 14, bat Mali Ya shani pat hkum sai re.



Raitim rapdaw salang ni gaw shi a tsaw dik ahkaw ahkang veto shaprai kau lu ai sin dan pa (me) kalang bai hta na re lam ga sadi jaw wa sai re.

Mungdaw asuya lawu rapdaw ningbaw de ka ai laika hta, tinang nan Hkristan langai rai nga ai, Mungdaw Up Slg. Bill Haslam (Republican pati) tsun ai gaw, Chyum Laika hpe Mungdaw a Laika Buk masat ai lam gaw Amerikan hte Tennessee, gaw da ai tara ni hta ka tawn ai makam masha ahkaw ahkang lam ni hpe ninghkap ai lam re nga, tsun ai.

“Nye a dinghkrai hkam sha ai tsun mayu ai gaw tara nhprang gaw Chyoi Pra ai Chyum Laika a manu hpe ahpa atang galaw kau ai lam re,” nga Slg. Haslam ka da ai.

Chyum Laika hpe mungdaw laika buk masat na tara nhprang hpe lawu rapdaw (house) e shagrin ngut nhtawm lahta rapdaw (senate) hta bai shagrin dat ai nhtoi bat mi kaw, veto hte pat hkum wa ai re.

Slg. Haslam gaw 2014 ra lata poi e kahtap lata hkrum ai rai nna, shi gaw dai tara nhprang n byin wa hkra pat hkum kau na matu, karai kata hte makam masham n nga ai mung shawa ni a dip n-gun jaw hkrum nga ai re.

American Civil Liberties Union of Tennessee a mu gun ningbaw Slg. Hedy Weingberg tsun ai gaw, veto lang ai dawdan ai hpe shi madi shadaw ai tsun nna, “ra lata sharawt dat ai salang ni gaw tinang a shara ahkaw ahkang hpe nawku makam masham langai a matu kaw sha n jai lang ging ai,” nga ai.

Slg. Haslam hku nna dai tara nhprang hpe sen htu shagrin dat ai rai yang, Tennessee gaw Chyum Laika hpe mungdaw a laika buk hku tara shang masat ai, shawng n’nan na Amerikan mungdaw tai wa na re.

Tara nhprang hpe madi shadaw ai rapdaw salang ni gaw Slg. Haslam a veto hpe shaprai kau lu na matu sin dan pa (me) kalang bai hta na ga sadi jaw tsun wa sai re. Rapdaw lahkawng yan kaw me law dik bai dang ai shaloi veto hpe shaprai kau lu na re.

Tennessee mung masha yawng a tsa shadaw 62% gaw mungdaw a laklai ai labau masa, hpaga yum ga masa hte htunghking masa ni ntsa hkam la tawn ai lam ni hpe masat ya ai hku nna Chyoi Pra Ai Chyum Laika hpe Mungdaw a Laika Buk shatai na ra sharawng nga ai re lam, tara nhpang tang shawn ningbaw, lawu rapdaw salang, Slg. Jerry Sexton tsun ai.

Slg. Jerry Sexton hte lahta rapdaw salang Steve (Southerland) yan gaw veto shaprai kau lu hkra matut shakut sa wa na hkyen nga ai lam, chye lu ai.


0 comments:

Post a Comment