Monday, April 11, 2016

KIA dap 2 yen ya ai hpang Myen dap htu shadut ai lam gan zim


Ginjaw laiza makau, Laji Yang hpyen man

N-gun kaba hte gap gasat ai majaw Laiza makau KIA maga shawnglam post 2 yen ya ai hpang, Myen asuya dap a htu shadut lam daini bat Langai Ya jahpawt du hkra gan hkring nga ai re.

Lai wa sai bat KIA Dapdung 18 ginra kata yen ya ai Sut Shang post hte Nbu Kawng post lahkawng hta asuya dap ni shang dung ai lam n galaw shi tim, grupyin e shara la tawn ai lam, shawnglam KIA shiga lawk tsun ai.

Dai post lahkawng gasat zing ai hta Myen hpyendap maga Hk.L.Y 40, Hk.L.Y 63, Ts.K.Hk-3 kata Hk.M.Y 382 hte 383 ni, n-gun maram 500 jan na re lam, shawnglam na KIA du kaba langai Jinghpaw Shiga Dap KNG de tsun ai.

Laiza a sinna-dingdung maga, Myitkyina-Manmaw mawdaw lam ntsa Ban Dawng Yang, KIA Sut Shang Post hpe April praw 7 hta yen ya nna, hpang shani Nam San Yang makau Ban Dawng hte Lazing Kawng lapran, Nbu Kawng post hpe yen ya ai re.

Ya na zawn asuya dap gaw tinang KIA shawnglam post lahkawng gasat zing ai ten, KIO/KIA ginjaw gaw ‘hpyen masa hta mungmasa hpe mahtang madung dat na re lam,’ KIO/KIA du salang ni tsun nga ai re.

Myen mung kata, Slg.jan Awng San Su Chyi ningbaw ai, Amyusha Democracy Ginjaw NLD pati woi awn ai mungshawa asuya lung wa ai nhtoi bat mi ten, Myen hpyendap gaw laklak lailai Laiza makau KIA shawnglam post lahkawng hpe gasat zing ai lam re.


0 comments:

Post a Comment