Jinghpaw mung de Sam Hkyeng hpyendap shagreng

Shan Nationalities Army - facebook

Jinghpaw mungdaw de Sam Hkyeng hpyendap ni grai shagreng wa sai lam hpe April praw 5 Mai Ja Yang dapshawa sanglang hpawng e KIO/KIA ningbaw ni tsun wa sai re.

Shanni Nationalities Army (SNA), Sam Hkyengdap ni gaw, ya ten Manmaw ginwang Manje myo-ne, Mali Hka mayan, Hpakan hte Hkamti (Hpakan makau, Sagaing Ginwang) ginra ni hta du taw nga sai lam, KIA Dap Awn Daju, C.S Du Kaba Gunhtang Gam Shawng tsun wa sai re.

Du Kaba matut tsun ai hta, SNA dap ni hpe Myen hpyendap ni laknak htuk ya nna majan kalang gasat lu na madang, hpyendap langai hpe sinat pala 5,000 jan mung htuk ya sai re, nga ai.

Dai rai nna, Sam Hkyeng dap ni hte manghkang n byin u ga koi yen lu na matu, tinang KIO ginjaw gaw Sam Hkyeng ningbaw ni hpe kade n na ai aten hta sha, Laiza de shaga hkrum ai lam ni mung galaw wa sai lam, chye lu ai.

Ya ten, gara wuhpung ni shangun dat ai re n chye ai hpungkyi ni mung Laiza e du nga ai lam sagawn chye lu ai.

Maning October shata Dingda Sam mung daju Sam hpyen RCSS/SSA-S gaw Myen asuya hte NCA Mungdan Ting Simsa Lam Ga Sadi sen htu sai. Dai ngut ai hte, RCSS daju Loi Tai Leng e hpyen wunkat sa la ai Sam Hkyeng SNA n-gun 300 jan gaw, Myen hpyendap hte RCSS shimlam jaw ai npu, Jinghpaw mungdaw Manmaw, Manje de du shang nga sai lam, KIA shiga lawk tsun ai.

SNA, Sam Hkyen Amyusha Hpyendap hpaw dat sai shiga gaw dai ning Shaning N’nan hpang pru wa ai re. Raitim ndai wuhpung a ningbaw kadai re ai lam gaw ya ten du hkrak n chye shi ai re.  Raitim, shanglawm woi awn ai ni hta lai wa sai 1994 ning KIO ni Myen hte simsa lam sen htu na shaloi, Ningbaw kaba Mali Zup Zau Mai, KIO ginra na atsai sha gawt kau ai 8 mali Myen jawngma dap hta lawm ai Sam hkyeng ni re lam sagawn chye lu ai.

“Sam mung de Jinghpaw hpyendap nga ai majaw, Jinghpaw mungdaw de Sam dap nga ra ai” ngu ai gaw Myen a masing re lam, KIA Dap Awn Daju, C.S Gunhtang Gam Shawng tsun wa sai re.

Posted in: