Laru hpyen hkrum ai Maga Yang dabang garum ntum ra ahkyak

Maga yang hpyen yen dabang

April 19, mani byin ai nbung laru a majaw hten za mat ai Waimaw ginwang, Maga Yang hpyen yen dabang ginsum nta ni bai gawgap na matu garum ntum ra nga ai lam chye lu ai.

Hten mat ai nta ginsum ni hpe bai gaw gap la na matu ‘International Red Cross’ IRC hta lai laga kadai hpe n chye matut ai lam Miwa ga jarit masat shadaw 8, Maga Yang hpyen yen dabang up Slg. Lasang Brang Seng gaw ya na zawn tsun ai.

“Ndai ten garum lu yang grai hkrak na re. Dai ni mung anhte kaw na ni gaw bai mai gram ai ni hpe gram lajang nga ai. Anhte dabang lit hkam komiti ni mung IRC hta lai laga kadai hte mung n chye matut ai majaw grai yak nga ga ai.”

Ya ten, Maga Yang dabang hta daw apa mat ai nta yawng 263 na hpyen yen ni gaw camp kata laika sharin jawng 2 hte ma shalet ginsup nta ni hta yup shingbyi nga ai lam chye lu ai.

Dai ning tsang 8 du hkra lung na jawng ma yawng 700 jan nga ai majaw daw hten mat ai laika sharin jawng malai, nta n’nan lawan shachyaw ra na lam dai dabang up wa tsun ai re.

Bat Lahkawng Ya laru a majaw, Maga Yang dabang e hten za ai lam law dik rai nna, laga Zai Awng, Pajau hte Dabu Bum hpyen yen dabang ni hta mung hten za ai lam nga ai hpe chye lu ai.

Dai re majaw Hkatawlik Kayuna garum ntum hpung gaw hpawt ni hpawt din hkan nbung laru majaw hten mat ai nta ginsum ni hpe sa du gawan yu na re lam matut chye lu ai.

Jinghpaw Mungdaw kata asuya hte Wunpawng Mungdan Shanglawt Hpung KIO majan kalang bai byin wa ai majaw, mung shawa sen mi jan hpyen hprawng nga ai gaw du na June shata hta 5 ning hpring sana re.

Posted in: