Mani hpawt, Laiza makau Ban Dawng Yang KIA Dung (18) a shawnglam post lahkawng hpe laja lana gap gasat zing ai Myen asuya dap ni hpe KIA ni bawm hte dai hpawt matai htang dat sai.
Buga aten jahpawt hkying 9 daram e KIA ni yen ya ai shara de shang wa ai Myen hpyen ni hpe remote bawm mali hte hkap dep ai hta, si hkala law na re lam KIA shawnglam shiga tsun ai.
Ndai zawn machyi hkrum ai majaw pawt nna Myen ni gaw grupyin na KIA dap ni hpe aten tsawm ra mi na hkra laknak kaba ni gap sharu bun ai lam, chye lu ai.
Ya ten bai zim mat ai raitim hpyen masa shaja hkat ai madang tsaw nga dingyang re lam chye lu ai.
Myen hpyendap gaw Myitkyina-Manmaw mawdaw lam a sinna, Nam San Yang a lawu (pa) de nga ai KIA dap ni mahkra tsepkawp ye jasan kau na ‘hpyen majan masing’ galaw nga ai re lam, KIA salang ni tsun ai. Ya ten, Myitkyina, Manmaw hkan na hpyen n-gun kaba hpe dai shara ni de htu tawn sai lam, matut chye lu ai.
KIO/KIA gaw ya lung wa ai mung shawa asuya hte mung masa jahta na madung dat na re ai hta, maga mi de asuya dap ni a htu gasat ai lam hpe mung shingla mat na re lam, KIA salang ni tsun ai.
0 comments:
Post a Comment