Hkristan ningtau gumsan magam ntsa facebook e ninghkap

hkristan gumsan magam hpe ninghkap ai wa hte democracy hte ginhka ai lam n mai nga ai ngu tsun ai wa

Hkristan langai Myen mung a ningbaw shara du wa sana re majaw, Hkang amyusha Slg. Henry Ban Thio hpe tinang NLD pati hku nna ningtau gumsan magam lata dat ai March 10 ya a hpang, facebook e ja ja ninghkap ai ningmu ni pru wa ai re.

“Bukda mungdan e Hkristan langai ningtau gumsan magam lata hkrum ai lam” ntsa Myen shiga dap ni hta ninghkap dinglun ai lam n nga shi tim, facebook, ganghkau shawa matut mahkai pinra e ja ja ninghkap ai hpe mu lu ai.

‘Ashin Agga Dhamma’ a facebook hta, “…Hkristan langai hpe gumsan (snr) ningtau gumsan magam dang ai gaw NLD pati a n kaja ai lam re hte Bukda Sasana Makawp Maga Hpung hku nna ningtau gumsan magam shara hta Hkristan rai rai, Islam rai rai tsepkawp hkap la na n re...” nga ka da ai.

Bai nna, ‘tit-sa-yawng-chi (သစၥာေရာင္ ျခည္)’ a facebook hta gaw “Myen mung Bukda mungdan e Hkristan langai hpe gumsan magam (snr) ningtau gumsan magam shara jaw ai hpe tsepkawp tsepkawp n hkap la lu ai lam” ka da ai.

Raitim facebook nkau hta gaw teng man ai maga tsap ai hpe mu lu ai.

‘Ashin Uttama’ a facebook hta, “…democracy mungdan e mungdan ningbaw langai gaw shan chyang, shan hpraw, nga rem masha, mawdaw gawt, Mon raitim, Hkang raitim, Bukda raitim, Hkristan raitim myit n lawm ai. U-zin myit lawm ai gaw shi a hpaji, shi a myit masin, arawn alai hte mungshawa ni a ntsa tawn da ai tsawra myit she re. Makam masham ningbaw hpe lata taw ai n re. Mungdan a ningbaw hpe lata taw ai she re...” nga tsun da ai.

Myen mung a nambat langai ra lata Hkringmang Daju U Nu gaw, 1947 ning Panglong ga sadi hte maren n hkan sa ai sha n ga, rau jawm de ai munghpawm hpe ‘Bukda mungdan’ ngu nna 1961 ning hta ndau dat sai. De a majaw Bukda n re ai kaga nawku makam masham hpung ni ginhka dip sha hkrum ai gaw ya ten du hkra naw rai nga ai.   

Posted in: